Njama za Kuuawa Kwa Dk. Slaa: IGP Adai CHADEMA Wanapiga Siasa

JESHI la Polisi nchini limesema hakuna mtu yeyote anayehojiwa au kushikiliwa na jeshi hilo akihusishwa na madai ya viongozi wa Chama cha Demokrasia na Maendeleo (Chadema) ya kuwepo kwa njama za kutaka kumuawa Katibu Mkuu wa chama hicho, Dk. Wilbroad Slaa.

Ijumaa iliyopita, madiwani wawili wa chama hicho kutoka mkoani Shinyanga, waliorejea tena na Chadema baada ya mapema mwaka huu kukihama na kuingia Chama Cha Mapinduzi (CCM), waliibua tuhuma nzito dhidi ya baadhi ya viongozi waandamizi wa CCM kwamba walikuwa na mpango wa kuidungua helikopta aliyokuwa akiitumia Dk. Slaa na viongozi wengine wa juu wa chama hicho. Madiwani hao ni Peter Sebastian ‘Obama’ wa Kata ya Ngokolo na Martine Mfuko wa Kata ya Msekelo, Shinyanga.

Akizungumza jana na Raia Tanzania, Inspekta Jenerali wa Polisi (IGP), Ernest Mangu, alisema mbali na kuzisikia na kuzisoma tuhuma hizo kwenye vyombo vya habari, jeshi hilo halijapokea taarifa au malalamiko kutoka kwa viongozi wa Chadema Mkoa wa Shinyanga wala Makao Makuu Dar es Salaam kuhusu suala hilo zito.

Alisema kama Jeshi la Polisi lingepata taarifa hizo, ni wazi hatua stahiki zingechukuliwa ikiwa ni pamoja na kufanyika kwa upelelezi dhidi ya yeyote anayehusika au kuhusishwa na suala hilo.

“Hatuwezi kuchukua hatua yoyote kwa sasa kwani viongozi hao (madiwani wa Chadema) hawajatoa taarifa. Inawezekana kuwa hizo ni siasa tu,” alisema Mangu.

“Kazi zetu zinafanyika kwa taratibu zake, na katika hili, hatuna kitu chochote cha kukifanyia kazi kwani hakuna taarifa iliyoripotiwa kwetu. Ingekuwa ni busara kwa viongozi hao kutoa taarifa juu ya njama za kudunguliwa helikopta ya Chadema. Sasa kukaa kwao kimya, jeshi litaanzia wapi uchunguzi?” alisema na kuhoji IGP, huku akisistiza kuwa taarifa hizo ni michezo ya kisiasa tu.