MAWAZIRI MIZIGO WALIKWEPA RUNGU LA JK

Wengi wakana kuhojiwa na Kamati Kuu udhaifu wao
*Nape awasuta, Lema amlipua Waziri Medeye
HOFU ya mawaziri wanaodaiwa kuwa mizigo imezidi kuongezeka, baada ya wengi wao kujaribu kukwepa rungu la Rais Jakaya Kikwete la kutupwa nje ya Baraza la Mawaziri.

Hofu ya mawaziri hao ambao wiki iliyopita walihojiwa na Kamati Kuu ya CCM mjini Dodoma, wameibuka na kudai hawakuitwa mbele ya kamati hiyo kutokana na kushindwa kutimiza majukumu yao kama inavyodaiwa.

Wakizungumza na RAI kwa nyakati tofauti mjini Dar es Salaam jana, baadhi ya mawaziri hao walisema wao si mawaziri mizigo, bali ni mawaziri kamili wanaofanya kazi kwa mujibu wa sheria na taratibu za nchi.