Maximo Awapa Jeuri Tegete, Cannavaro

Na Wilbert Molandi 

WACHEZAJI mahiri wa Yanga, beki Nadir Haroub ‘Cannavaro’ na straika Jerry Tegete, wamefurahishwa na ujio wa Kocha Mbrazili, Marcio Maximo katika kikosi cha Yanga na wakatamba kuwa timu yao itakuwa tishio msimu ujao.

Maximo ambaye yupo katika mazungumzo ya mwisho kabla ya kusaini mkataba Yanga, ndiye aliyemuibua Tegete akimtoa kwenye kikosi cha Shule ya Sekondari Makongo jijini Dar, kuja kuichezea Stars na Cannavaro ndiye aliyekuwa nahodha wa kikosi hicho enzi za Mbrazili huyo.

“Hakuna asiyejua uwezo wa kufundisha wa Maximo, kila mtu anaujua, anaweza kuhamasisha wachezaji ndani na nje ya uwanja, hivyo mashabiki watarajie mengi mazuri.

“Maximo anajua kumtengeneza mchezaji na akawa bora, ninaamini ujio wake Yanga utakuza na kuwaendeleza wachezaji ili wawe na viwango vikubwa, ninajua uwezo wake, aliwahi kunifundisha,” alisema Tegete.

Kwa upande wa Cannavaro, alisema: “Wapinzani wenzetu wajiandae msimu ujao wa ligi, ninaamini timu yetu itakuwa bora zaidi, kama wachezaji tukimpa ushirikiano Maximo, atafanya vizuri.

“Alishawahi kunifundisha nikiwa ninacheza katikati na (Kelvin) Yondani kwenye kikosi cha Stars, hivyo ninafurahia ujio wake.”