Nuhu Mziwanda: Uhusiano Wangu wa Kimapenzi na Shilole Umenipa Kick ya Kutoka Kimuziki

Mwaka 2013 ni watu wachache tu waliokuwa wakilifahamu jina la Nuh Mziwanda kwakuwa alikuwa msanii mchanga anayetafuta nafasi yake kwenye muziki wa Tanzania. Wimbo wake ulioanza kumtambulisha uliitwa ‘Otea Nani’ ambao ulipata nafasi kiasi kwenye vituo vya redio.

Lakini jina la muimbaji huyo lilikuja kuwa kubwa zaidi baada ya kuanzisha uhusiano wa kimapenzi na Shilole, uhusiano ambao umekuwa wa wazi katika mitandao yao ya kijamii. Kuonesha kuwa ana mapenzi ya kweli kwa Shilole ambaye ni mama wa watoto wawili, Nuh alijichora tattoo mkononi yenye jina la Shilole.

Shilole pia aliamua kumpa shavu mpenzi wake kwa kuonekana kwenye video ya wimbo wake ‘Msondongoma’ na hivyo kumwongezea wigo zaidi. “Yeye ndo Mama watoto Mungu akijaalia,” aliandika Nuh kwenye picha ya Shilole aliyoiweka kwenye akaunti yake mtandao wa Instagram yenye followers zaidi ya 19,000.

“Ukichagua kitu roho yako inapenda raha sana.sasa kwa mfano mimi Mziwanda nna haja gani ya kucheat wakati mtoto ana kila kitu, kiukweli napenda mke wangu alivyojaa jaa mie hoooooi,” aliandika kwenye picha nyingi ya Shilole.

Naye Shilole kwenye picha aliyoiweka kwenye mtandao huo akiwa na Nuh Mziwanda aliandika, “Ilove my baby,” kudhihirisha upendo wake. Hakuna shaka kuwa uhusiano huo umemwezesha Nuh Mziwanda kukuza jina lake na ameutumia vizuri kujitambulisha zaidi.