Hospitali Mwananyamala Yapambana na Wauguzi Wakatili Wakati wa Kutoa Matibabu

Kwa muda mrefu hospitali ya Mwananyamala ya jijini Dar es Salaam imekuwa ikikumbwa na kashfa mbalimbali ikiwemo rushwa, unyanyasaji wa wagonjwa, na vifo vya watoto wachanga kutokana na uzembe unaodaiwa kufanywa na wauguzi wa hospitali hiyo. 

Vyombo mbalimbali vya habari vimekuwa vikiripoti kuhusu matukio yaliyowahi kutokea katika hospitali hiyo wakiwamo baadhi ya wauguzi kudaiwa kushiriki katika dhuluma ya kumbadilisha mtoto mwanamke aliyejifungua kwa kumpa mtoto mfu. 

Wakati serikali na wanaharakati wakiwa katika kampeni ya kupinga ukatili dhidi ya wanawake na kupunguza idadi ya kasi ya vifo vya akina mama wanaojifungua na watoto wachanga, wauguzi  wanaofanya vitendo hivyo vya ukatili ni lazima wapewe adhabu ili kupunguza  tatizo hilo na kulitokomeza kabisa.

Akiongea na NIPASHE Jumapili jana Mganga mkuu wa hospitali ya Rufaa ya Mwananyamala Dk. Sophinias Ngonynani, alisema : "Mwananyamala imekuwa ikikumbwa na kashfa mbalimbali ikiwamo hasa rushwa na tunajua anayetoa na kupokea rushwa wote ni wakosaji hivyo tumeliona hili tatizo na kuamua kotoa elimu kwa wauguzi pia na kwa wagonjwa mbalimbali na kutokana na hili tatizo hili limeweza kupungua na kupunguza idadi kubwa ya malalamiko haya."

Aidha kwa upande mwigine alielezea jinsi wanavyokabiliana na wauguzi ambao wamekuwa wakituhumiwa kwa makosa mbalimbali ikiwamo vifo vya uzembe, rushwa , na unyanyasaji wa wagonjwa.

 "Tumekuwa tukitumia utaratibu wa kupokea malalamiko kisha tunafanyia uchunguzi kwa umakini baada ya kuwabaini wahusika tunawachukulia hatua mbalimbali ikiwamo kuwafukuza kazi, kumuhamisha kikazi  na  kupewa  onyo kali,” alisema.

Alisema kutokana na takwimu za ofisi za Ustawi wa Jamii, tatizo hilo limepungua kwa asilimia 80 kwa kipindi cha mwaka jana.

“Tumweza kuwachukulia hatua hizo jumla ya waauguzi 115 hivyo tunaamini tatizo hili tutaweza kulimaliza kwa kadri muda unavyozidi kwenda,” alisema. Akielezea changamoto wanazokumbana nazo, alisema watumishi wachache, bajeti, rasilimali za kufanyia kazi na uchache wa majengo ni kati ya matatizo wanayokumbana nayo.

Hata hivyo, alisema anaamini matatizo hayo yataweza kutatuliwa na hivyo kufanya huduma afya kuwa bora kwa kila mwananchi Mkazi mmoja wa Kiwalani Bombom aliyeathirika kwa kupoteza mtoto wakati akiwa anabishana na  wahudumu wa hospitali hiyo baada ya kugoma kumhudumia kwa madai kuwa hakupaswa kujifungulia hospitalini hapo.

"Kwa kweli niseme tu kwamba yaliyonifika nilipokwenda kujifungua Mwananyamala yatabaki kwenye kumbukumbu maishani mwangu" alisema, Mwanahawa Ashura.
CHANZO: NIPASHE JUMAPILI