Aunty Ezekiel: Jamani niacheni ni maisha yangu

NYOTA wa filamu za Kibongo, Aunty Ezekiel amesema hapendelei kuwaona watu wakimsumbua kwa kumtaka afanye wanavyotaka wao, ilhali yeye ana maisha yake binafsi.

Mwigizaji huyo aliyefanya sherehe ya kuzaliwa siku chache zilizopita, alisema licha ya kwamba yeye ni kioo cha jamii, lakini kuna wakati anapaswa aachwe ili aishi maisha yake binafsi, kwani anaamini umaarufu siyo mzigo.

“Nikiwa kama msanii ninapaswa kuishi maisha ya aina fulani ili niwe mfano kwa jamii, kinachonishinda ni watu wanaotaka niishi vile wanavyotaka wao, jambo ambalo si sahihi, ni vizuri wakakumbuka kwamba na mimi ni binadamu na nina maisha yangu binafsi,” alisema na kuongeza:

“Mfano katika akaunti zangu za mitandao ya kijamii, watu wananichagulia picha za ‘kupost’ kila siku kioo kioo, mnatuita vioo vya jamii wakati mnatutukana kila siku, kioo changu kimevunjika mjue hivyo nitafanya vile ninavyotaka na si mtakavyo ninyi,” alijigamba mwigizaji huyo.