CRDB Yampa PAUL Makonda Milioni 100 Kusaidia Ujenzi wa ofisi za Walimu kwa Shule za Msingi na Sekondari

Paul Makonda

Benki ya CRDB leo Jumatatu imekabidhi msaada wa Sh100 milioni kwa Mkuu wa Mkoa wa Dar es Salaam, Paul Makonda kwa ajili ya kusaidia ujenzi wa ofisi za walimu kwa shule za msingi na sekondari mkoani hapa.

Mbali na kukabidhi fedha hizo, mkurugenzi mtendaji wa benki hiyo, DK Charles Kimei ameahidi kuongeza Sh100 milioni katika bajeti ijayo.

"Mwalimu ndio chanzo cha maarifa ya kila mtu, tukitengeneza mazingira mazuri ya ufanyaji kazi kwake hata elimu inayotolewa itakua na kiwango," amesema Dk Kimei.

Amesema ili Taifa liweze kusonga mbele kimaendeleo ni lazima kuwekeza katika kutatua changamoto mbalimbali zinazoikabili sekta ya elimu na kuweka mazingira bora ya ufundishaji.

Mwenyekiti wa Kamati ya Ujenzi ya Mkoa wa Dar es Salaam, Kanali Charles Mbuge alimhakikishia Dk Kimei kuwa pesa zilizotolewa zitafanya kazi iliyokusudiwa.

"Thamani ya pesa iliyotolewa italingana na kile kitakachofanyika na hii iwe chachu kwa benki nyingine kuweza kuchangia ujenzi huu," amesema Kanali Mbuge.

Mkoa wa Dar es Salaam una jumla ya shule 638 zikiwa na upungufu wa ofisi 402 za walimu.

Chanzo: Mwananchi