Pele wa Brazil Amewahi Kuitembelea Yanga ?

Mabingwa watetezi wa ligi kuu soka Tanzania Bara klabu ya Yanga wamethibitisha kuwa waliwahi kupata nafasi ya kutembelewa na klabu ya Santos ya Brazil pamoja na mfalme wa soka duniani Pele, japo ziara hiyo haikukamilika.

Kupitia ukurasa wa klabu wa Instagram wameweka picha inayoonyesha nguo aina ya Kanga yenye maneno yanayoashiria kuwa ilikuwa ni sehemu ya maadalizi ya kuipokea Santos pamoja na Pele. “Pele na Santos, Wageni wa Yanga”, imeandikwa Kanga hiyo.
Maelezo ya picha hiyo yameeleza kuwa ziara hiyo ilikuwa mwaka 1972 ambapo klabu kongwe ya Santos yenye mafanikio katika soka la Brazil na duniani ikiwa na historia ya kuwatoa nyota wakali duniani kama Pele, Robinho na Neymar Jr ilitakiwa kufika nchini lakini ilishindikana.

“Hii ilikuwa 1972, Baadae ziara ya timu hiyo kutoka Brazil ikaahirishwa na @santosfc kuishia Nairobi kisha kurejea kwao. Unajua ni kwasababu gani? Usikose toleo la pili la Yanga Magazine”, ni maneno yaliyoandikwa chini ya picha hiyo.
Huenda undani wa safari hiyo ukajumuishwa kwenye mwendelezo wa Jarida la klabu hiyo (Yanga Magazine) katika toleo lijalo kama ilivyoelezwa na labda tunaweza kushuhudia safari hiyo ikapangwa upya na klabu hiyo ikaja nchini.