''Hakuna kama Ronaldinho labda Messi''

Kocha wa Manchester City Pep Guardiola ametoa heshima ya kumuaga nyota wa zamani wa Barcelona na Brazil Ronaldino Gaucho ambaye amestaafu soka kwa kusema hakuna kama yeye labda Messi.


Guardiola ambaye alimuuza Ronaldinho kutoka Barcelona kwenda AC Milan mwaka 2008, amesema wakati Ronaldinho anacheza Barcelona alikuwa mchezaji bora kuwahi kutokea hadi Lionel Messi alipochukua nafasi yake.

"Alikuwa mchezaji mwenye kipaji cha ajabu nafikiri hadi Messi alipokuja kuiteka dunia lakini kiukweli sikuwahi kuona kiwango cha namna ile katika siku za nyuma, hivyo namtakia mapumziko mema na kila la kheri katika majukumu mengine atakayoyaanza'', Guardiola amewaambia wanahabari.

Guardiola pia ameongeza kuwa mafanikio aliyoyapata akiwa Barcelona ilikuwa ni mwendelezo wa kile walichokianzisha Ronaldinho na Rais wa kipindi hicho wa Barcelona Joan Laporta kutokana na ukweli kwamba kabla ya Ronaldinho timu haikuwa kwenye kiwango kizuri.

Guardiola ambaye timu yake ya Manchester City leo itakuwa nyumbani kucheza na Newcastle United amemaliza kwa kusema kuwa anamshukuru Ronaldinho aliondoka vizuri na hana tatizo naye.