Baada ya Utata wa Waamuzi Simba Watoa Neno

Klabu ya soka ya Simba kupitia kwa msemaji wake Haji Manara, imewataka waamuzi wa mchezo wao dhidi ya Yanga siku ya jumapili kufanya maamuzi kwa kuzingatia sheria 17 zinazoongoza mchezo wa soka.


Akiongea leo kuelekea mchezo huo utakaopigwa kwenye uwanja wa taifa jijini Dar es salaam, Manara amesema pamoja na kuwepo kwa utata kwenye suala la waamuzi wa mchezo huo lakini wao kama klabu wanaomba tu wazingatie sheria 17.

''Kwenye suala la waamuzi naomba tuyaache mengine ila niweke wazi tu kuwa, wachezeshe kwa kuzingatia sheria 17 za soka, nasisitiza wachezeshe kwa kuzingatia sheria 17 za soka'', amesema Manara kwa msisitizo.

Kumekuwa na utata baada ya shirikisho la soka nchini TFF kupitia kwa kamati ya waamuzi kumtangaza mwamuzi Emmanuel Mwandembwa kuchezesha mchezo huo huku ikimtambulisha kuwa anatokea Mwanza wakati anatokea Arusha.

Hata hivyo mwenyekiti wa kamati ya waamuzi Salum Chama, amefafanua kuwa wamemtambua Emmanuel Mwandembwa kama mwamuzi anayetokea Mwanza kwasababu yupo kwenye chuo cha michezo Malya mkoani huko kwa masomo yanayochukua miaka mitatu.