Katibu wa Itikadi na Uenezi wa CCM, Humphrey Polepole amelitaka jeshi la polisi kuhakikisha wanachama na viongozi wanaotoka katika vyama vya upinzani na kurudi CCM wanaishi amani, ikiwa ni baada ya kupata taarifa kwamba kumezuka tabia ya kutishiana amani.
Katibu waItikadi na Uenezi wa CCM, Humprey Polepole
Akiwa katika kampeni za uchaguzi mdogo katika kata ya Makanya wilayani Same mkoani Kilimanjaro, Polepole amesema kwamba kila mwananchi ana uhuru wa kuabudu na kukiamini chama anachokitaka kwa mujibu wa katiba ya nchi, lakini katika hali ya kushangaza viongozi na wanachama wa upinzani ambao wamekuwa wakihamia CCM, wamekuwa wakiishi kwa mashaka kutokana na kupewa vitisho.
Polepole amelitaka Jeshi la Polisi nchini kuhakikisha kuwa wale wote ambao wamekuwa wakiwatisha wananchi na kuwanyima uhuru wao wa kikatiba kuwachukulia hatua na kudai kuwa hayupo tayari kuona wana CCM wakiteseka
“Kumekuwa na vitendo vya ajabu vinavyofanywa na baadhi ya watu kuwatisha wananchi wanaohamia CCM sasa Jeshi la Polisi hakikisheni mnawachukulia hatua watu hao, mwanachama wetu mmoja akiguswa tu hatutavumilia,” amesema Polepole.
Mbali na hayo Polepole ameweka wazi kwamba Kata ya Makanya ina matatizo mengi ambayo diwani wake kipindi hicho alishindwa kuyatafutia ufumbuzi kutokana na kuwa katika chama kinachojali matumbo yao kisicho na dola na kushindwa pa kusemea matatizo hayo.
.webp)
