Ajali ya Dk Hamis Kigwangalla Yaendelea Kuwagusa Viongozi Wakuu wa Nchi, Waziri Mkuu Nae Aibuka

Waziri Mkuu Kassim Majaliwa amewasili katika Hospitali ya Taifa ya Muhimbili (MNH)  kumjulia hali Waziri wa Maliasili na Utalii, Dk Hamis Kigwangalla aliyepata ajali ya gari jana Jumamosi Agosti 4, 2018.

Dk Kigwangalla alipata ajali eneo la Magugu mkoani Manyara na kupata majeraha sehemu mbalimbali mwilini. Katika ajali hiyo ofisa habari wa wizara hiyo, Hamza Temba alifariki dunia.

Majaliwa alifika hospitalini hapa saa 4 asubuhi akiwa ameambatana  na mkewe na kupokewa na mkuu wa mkoa wa Dar es Salaam, Paul Makonda.

Waziri huyo aliyepata ajali hiyo, Babati mkoani Manyara, amelazwa wodi ya Mwaisela akiendelea na matibabu.

Awali, Kigwangalla alipatiwa matibabu katika kituo cha afya cha Magugu na kuhamishiwa hospitali ya Arusha Lutheran Medical Center kwa helkopta na kisha kuletwa Muhimbili jana jioni.