Kipa Aishi Manula Amsifia Kocha Mpya wa Taifa Stars Emmanuel Amunike

Mlinda mlango namba moja wa Tanzania, Aishi Manula, amefunguka juu ya ubora wa kocha wa timu ya taifa ya soka ya Tanzania 'Taifa Stars' kwa kusema ubora wa kocha Emmanuel Amunike utaisaidia Stars kucheza fainali za AFCON 2019.

Akifanya mahojiano maalum na www.eatv.tv Manula ambaye tayari yupo kwenye kambi ya Stars amesema uwezo wa kocha huyo raia wa Nigeria umewasaidia kupata sare dhidi ya Uganda hivyo wakiendelea kufuata maelekezo yake wanaweza kufuzu AFCON 2019.

''Mchezo wetu wa kwanza tukiwa chini ya kocha mpya tulicheza na Uagnda na unaweza kuona uwezo ulivyokuwa unaona kabisa ametutoa sehemu moja kutupeleka sehemu fulani ambayo tukikomaa tutafuzu'', amesema Manula.

Kwa upande wa Kundi L lenye timu za Tanzania, Uganda, Cape Verde na Lesotho, Manula amesema ni kundi rahisi lakini si rahisi bila kufuzu kwahiyo lazima waweke nguvu ya ziada ili kuweza kumaliza kilio cha watanzania ambao wanatamani kuiona timu yao ya taifa ikicheza.

Manula pia amesema wao kama wachezaji kambini wanatazama AFCON kama fursa ya kujitangaza kuweza kupata timu za kuchezea nje ya nchi hivyo wanatamani sana wafuzu ili wawakilishe taifa na kusaidia kupanda kwenye viwango vya FIFA.