Nawajua Mabingwa wa Kuomba Rushwa ya Ngono -Mbunge

Siku moja baada ya Taasisi ya Kuzuia na  Kupambana na Rushwa nchini  (TAKUKURU) kutangaza kumshikilia Mhadhiri wa Chuo kikuu cha Dodoma, Jakob Nyangusi kwa tuhuma za kudai rushwa ya ngono kwa mwanafunzi wake, Mbunge wa Jimbo la Ulanga Goodluck Mlinga amesema alishapata taarifa za mhadhiri-


huyo pamoja na baadhi ya wahadhiri wengine aliowatuhumu kuwa ni mabingwa wa kuomba rushwa hiyo.

 Mbunge huyo amesema baada ya kutoa taarifa mara nyingi bungeni juu ya kuwepo kwa vitendo hivyo kwenye baadhi ya vyuo, amedai alipokea ujumbe mbalimbali wa maneno kutoka kwa baadhi ya wasamalia wema wakiorodhesha majina ya walimu wengine wawili wanaojihusisha sana na rushwa ya ngono.

"Kwanza huyo mmoja aliyekamatwa katika Chuo Kikuu Dodoma (UDOM) alitajwa mara 6, nilipotaka kupeleka majina nikaulizwa kuhusu ushahidi nikashindwa, sasa ushahidi ningeutoa wapi wakati nimepewa na wasamalia wema, na hili tukio linanipa nguvu kwamba taarifa nilizopokea kuwa ni za kweli", amesema Mbunge huyo. 

"Nina majina ya walimu wengine wawili, wanaotuhumiwa sana kuomba rushwa ya ngono na sio walimu tu  nina majina hadi ya wanafunzi ambao wamekuwa wakitumia ngono kama kigezo cha kufanya vizuri kwenye mitihani yao." ameongeza Mlinga.