Mechi hiyo ambayo inatarajiwa kuwa na ushindani mkubwa itachezwa Desemba 4, mwaka huu kwenye Uwanja wa Mavuso Sport Centre uliopo jijini Mbabane nchini Eswatini.
Hata hivyo, habari za kuaminika kutoka ndani ya Simba ambazo Championi Ijumaa limezipata zimedai kuwa uongozi wa timu hiyo chini ya mwekezaji mkuu wa klabu hiyo, bilionea Mohammed Dewji ‘Mo’ unajipanga kuhakikisha timu hiyo inafanya vizuri katika mchezo huo wa marudiano.
Imeelezwa kuwa baada ya mechi hiyo ya juzi ambayo Simba iliibuka na ushindi wa mabao 4-1, uongozi huo umetuma mtu nchini Swaziland kwa ajili ya kuweka mambo sawa ili timu hiyo itakapofika isikumbane na changamoto yoyote kama ilivyokuwa kwa Azam FC mwaka jana.
Wakati Azam FC ilipokuwa ikishiriki michuano ya Kombe la Shirikisho Afrika baadhi ya viongozi pamoja na wachezaji wa timu hiyo walikumbana na kichapo kutoka kwa mashabiki wa Mbabane Swallows wakati walipoenda nchini humo kwa ajili ya mchezo wa marudiano.
Hali hiyo inadaiwa kuwa moja ya chanzo cha timu hiyo kujikuta ikifungwa mabao 3-0 baada ya wachezaji kuvurugwa kisaikolojia na vurugu hizo na kujikuta wakitupwa nje ya mashindano hayo kwa jumla ya mabao 3-1.
“Kwa hiyo uongozi hautaki hilo litokee na umebaini kuwa baada ya kipigo hicho ambacho wamekipata hapa nyumbani watajipanga vilivyo huko kwao kuhakikisha wanalipa kisasi.
“Kama ilivyo desturi yao watahakikisha wanafanya kila jambo kupitia kwa mashabiki wao ili tu waweze kututoa mchezoni, kwa hiyo, uongozi umejipanga kwa hilo ndiyo maana mtu huyo kaagizwa kwa ajili ya kuweka mambo sawa,” kilisema chanzo hicho cha habari.
Hata hivyo, Mratibu wa Simba, Abbas Ally alipoulizwa kuhusiana na hilo alisema: “Ni kweli kabisa tunajipanga vilivyo kwa ajili ya mechi hiyo ya marudiano lakini pia kukabiliana na kila hila ambayo tutakumbana nayo tutakapokwenda kwao, hata hivyo mambo mengine kwa sasa siwezi kuyazungumzia.”
Stori Sweetbert Lukonge
.jpg)
