Msanii wa kike wa Bongo Fleva ambaye yuko kwenye game kwa muda mrefu, Dayna Nyange, amefunguka juu ya wasichana walio maarufu mitandaoni na kuingia kwenye muziki bila kuwa na vipaji.
Akizungumza na www.eatv.tv, Dayna amesema kwamba wasichana hao wanatakiwa watambue kuwa kama kazi zao hazitakuwa nzuri lazima zitafeli, licha ya pesa nyingi walizotumia kuwekeza.
“Kama kitu kizuri kitabaki, na kama kitu kibaya kitapotea, wengi wanaotumia pesa huwa wanatumia wakiamini watawapiku watu fulani kuwa watu fulani, lakini kazi kama sio nzuri haijiuzi unakuja kujikuta unaongeza tu mtaji, wengine wakiwa na nia na wakajifunza watabaki”, amesema Dayna.
Pia Dayna amewataka wasichana hao kuchukua muda kujifunza au kuomba msaada kwa wanaojua, ili kuweza kujitengeneza zaidi na wasipoteze pesa zao ambazo hazitarudi kutokana na kazi hizo.
Hivi karibuni mwanamitindo, Hamisa Mobetto kwa mara ya kwanza ameachia nyimbo zake mbili zinazojulikana kama 'Madam Hero' na 'Tunaendana' akifuatiwa na mwanadada mwingine maarufu katika mitandao ya kijamii, Irene Louis maarufu 'officiallyyn' ambaye ameachia nyimbo inayojulikana kwa jina la 'Chafu'.
.jpg)
