Afisa Mtendaji Mkuu wa Simba: Juuko Murshid Ametoroka Licha ya Kuwa na Mkataba

Afisa Mtendaji Mkuu wa klabu ya Simba, Crescentius Magori amesema kuwa beki wao wa Kimataifa wa Uganda, Juuko Murshid ametoroka licha ya kuwa na mkataba huku akitoa kisingizio cha kuumwa wakati akionekana na timu yake ya taifa Wakifanya mazoezi.

Mkurugenzi huyo, Magori ameyasema hayo hii leo wakati akizungumza na waandishi wa habari katika Hoteli ya Serena.

”Juuko Murshid anamkataba na Simba mpaka mwisho wa msimu, wakati timu imeenda kucheza Kanda ya Ziwa amesema anaumwa akabaki Dar es Salaam kujiuguza majeraha. Timu ilivyokuja Dar Es Salaam akawa tayari ameshatoroka amekwenda Uganda, hakumuaga kocha, meneja hakuaga uongozi.”

Ameendelea kwa kusema, "Juuko anafikiri kwamba anaweza kulazimisha kuhama, hawezi kulazimisha kuhama na kwasababu ametoroka kazini mshahara wa mwezi wa tano hatukumlipa na wa mwezi wa sita pia tutamlipaje mtu ambaye hayupo kazini. Kama ana timu amepata ije ili izungumze na Simba, lakini kama anazunguka zunguka tu basi atakula adhabu wala hataenda kokote mpaka mkataba wake utakapoisha Desemba.”.