Meya wa mji wa Mogadishu nchini Somalia ameaga dunia ikiwa ni juma moja baada ya kujeruhiwa katika shambulio la kujitoa muhanga ambalo liligharimu maisha ya watu sita.
Mwanamke mmoja alijilipua ndani ya ofisi ya meya Abdirahman Omar Osman wakati wa mkutano wa masuala ya usalama.
Bwana Osman, ambaye alikimbilia Uingereza wakati wa vita vya wenyewe kwa wenyewe miaka ya 1990, alikuwa diwani wa London kabla ya kurejea mwaka 2008 kusaidia kuijenga upya Somalia.
Kundi la wanamgambmo wa al-Shabab lilisema kuwa lilitekeleza shambulio hilo.
Meya huyo amefariki dunia mjini Doha, Qatar, ambako alikuwa akipatiwa matibabu.
Al-Shabab ilimlenga mjumbe maalumu wa Umoja wa mataifa nchini Somalia, James Swan, raia wa Marekani, ambaye tayari alishaondoka kwenye jengo hilo baada ya kukutana na meya tarehe 24 mwezi Julai.
Haikujulikana ni kwa namna gani mshambuliaji huyo aliweza kuingia ndani ya ofisi hizo zilizokuwa na ulinzi mkali.
Walioathirika kwenye shambulio hilo wengine ni maafisa wa juu.
Haki miliki ya pichaGETTY IMAGES
Meya ni nani?
Bwana Osman alitoroka Somalia mwanzoni mwa miaka ya 1990 akiwa mkimbizi, kabla ya kupata stahada yake na uraia wa Uingereza. Pia alikuwa diwani kwa tiketi ya chama cha Labour .
Alirejea Somalia mwaka 2008, ambapo alilitumikia taifa hilo kwa nafasi ya waziri wa habari na kuwa meya wa Mogadishu mwaka jana.
Katika ukurasa wa twitter, ujumbe wa Marekani nchini Somalia umemtaja bwana Osman kuwa ''mshirika mzuri sana na aliyekuwa akiwatumikia raia wa Somalia bila kuchoka''.
Al-shabab inataka kuangusha utawala wa Somalia na imekuwa ikifanya mashambulizi ya mara kwa mara mjini Mogadishu, pamoja na uwepo wa vikosi vya walinda amani wa Umoja wa Afrika na vikosi vya kijeshi vyenye mafunzo.
Kundi hili lenye mahusiano na kundi la wanamgambo wa al-Qaeda limekuwa na nguvu nchini humo.
.webp)
