Bulaya Asimulia Kipigo Alichopatia na Askari Magereza Asema ni cha Hatari Mpaka Sasa Hajaweza Kutembea ana Maumivu Makali

Mbunge wa jimbo la Bunda Mjini (Chadema), Ester Bulaya, asimulia kipigo alichopatiwa asema hakikuwa cha kawaida kwani mpaka sasa bado ana maumivu makali mwilini na hawezi kutembea.

Bulaya ambaye amelazwa katika Hospitali ya Agakhan kwa ajili ya matibabu baada ya kutembezewa kipigo na wenzake walivyokuwa wameenda kumpokea Mwenyekiti wao wa Chadema, Freeman Mbowe katika gereza la Segerea.

Alisema walienda kupelea risiti gerezani baada ya kufika katika eneo hilo hawakuruhusiwa kuingia ndani na kufukuzwa na askari magereza pamoja na kutukanwa.

“Walituambia wametupania hasa mimi na Halima kwamba tumewahi kutoka gerezani na walipanga kututesa tukamuuliza kwa nini unatutukana akajibu mpo kwenye himaya yangu nitawafanyia chochote kile nitawaonyesha,” alieleza Bulaya.

“Akaanza kupiga filimbi mara akanifuata katika gari na kuniwekea masiki na kuniambia mbona nyie mnatusumbua hatulali kwa ajili yenu baada ya hapo tukaondoka maana walishatuzuia pale getini,”

Alisema wakati wanaondoka wakashangaa wamekuja na kuwavuta katika gari “Mimi wamenivuta wawili ambao ni wanaume sikupigwa na mwanamke wakanitupia chini nikaangukia mgongo wakaanza kunikanyaga na kifuani na kichwani,”

Bulaya alisema hapo alipo hawezi kutembea ana maumivu makali.

“Kile kipigo sio kwamba kilikuwa ni cha bahati mbaya ni kipigo cha watu ambao walikuwa wamejipanga kutufanyia hivyo maana hapakuwa na hali yoyote ile ya kufanya hivyo kwanza sisi hatukuwa na silaha isitoshe tulikuwa ni wanawake tu katika gari,” alisema Bulaya.

Alisema kuna mmoja aliunyonga mkono wa Halima Mdee na yeye alipata majeraha katika uti wa mgongo, mbavu na kichwa bado kinamuuma.

“Nilipelekwa hospitali ya Amana nikiwa sijiwezi wakanipatia rufaa ya kwenda hospitali ya Muhimbili kwa vile hapa Agakhan nina madaktari wangu wanaendelea kunitibia,” alisema Bulaya.