JUMA Makapu, beki wa Yanga kipenzi cha Kocha Mkuu, Luc Eymael, amesema kuwa dua zao kubwa ni kushinda mchezo wao wa hatua ya robo fainali dhidi ya Kagera Sugar ili wakutane na Simba hatua ya nusu fainali wawanyooshe.
Yanga imepangwa kucheza na Kagera Sugar kati ya Juni 30 hadi Julai Mosi kwenye mchezo wa Kombe la Shirikisho la Azam Sports (ASFC), iwapo watashinda watakutana na mshindi kati ya mchezo wa Azam FC dhidi ya Simba.
Akizungumza na Championi Jumatatu, Makapu alisema kuwa wana imani watapata matokeo mbele ya Kagera Sugar na kutinga hatua ya nusu fainali ambapo wanaiombea Simba ipenye mbele ya Azam FC ili wakutane.
“Tunakutana na Kagera Sugar, ninaamini tutashinda na kutinga hatua ya nusu fainali, hapo sasa ndo tunaomba Simba ipite tukutane nao tena tuwafunge kwani tumeshawazoea tayari kwa sasa hawatutishi, itatatufungulia njia kimataifa tukikutana nao,” alisema.
Kwenye Ligi Kuu Bara, Yanga msimu huu iliwafunga Simba kwenye mchezo uliochezwa Machi 8 bao 1-0 huku ule wa Januari 4 zikilazimishana sare ya kufungana mabao 2-2.
Yanga ilitinga hatua ya robo fainali kwa kuanza kuinyoosha mabao 4-0 Iringa United Uwanja wa Uhuru, Desemba 21 mzunguko wa 62, ilishinda 2-0 mbele ya Tanzania Prisons Uwanja wa Taifa, mzunguko wa 32, Januari 26 iliwanyoosha Gwambina kwa bao 1-0 Uwanja wa Uhuru hatua ya 16 bora Februari 26 na kutinga robo fainali.
.jpg)
