Polisi nchini Haiti wanasema wamemkamata daktari ambaye wanaamini ni mshukiwa mkubwa katika kupanga mauaji ya wiki iliyopita ya Rais Jovenel Moïse.
Wanasema Christian Emmanuel Sanon, raia wa Haiti mwenye umri wa miaka 63, aliingia nchini humo kwa ndege binafsi mapema Juni huku akiwa na "nia za kisiasa".
Bw Moïse, 53, aliuawa nyumbani kwake mnamo Julai 7 na mamluki 28 wa kigeni, polisi walisema walithibitisha hapo awali.
Mkewe alijeruhiwa katika shambulio hilo na kisha kusafirishwa kwenda Marekani kwa matibabu.
Martine Moïse baadaye alielezea namna wauaji "walipommiminia risasi" mumewe katikati ya usiku.
Alisema shambulio hilo lilitokea haraka sana, mumewe Jovenel hakuweza "kusema neno hata moja."
Kukamatwa kwa Bw Sanon kulitangazwa katika mkutano wa polisi na wanahabari siku ya Jumapili katika mji mkuu Port-au-Prince.
"Huyu ni mtu ambaye aliingia Haiti kwa ndege ya binafsi akiwa na malengo ya kisiasa," mkuu wa polisi wa Haiti Leon Charles alisema.
Alisema mpango wa awali ulikuwa wa kumkamata Rais Moïse, lakini "misheni hiyo ilibadilika". Hakufafanua zaidi ya hapo.
"Wakati sisi, polisi, tulizuia vitendo vya majambazi hawa baada ya kufanya uhalifu wao, mtu wa kwanza ambaye mmoja wa washambuliaji alimpigia simu alikuwa Christian Emmanuel Sanon," amesema Bw Charles.
"Aliwasiliana na watu wengine wawili ambao tunachukulia kuwa ndio wapangaji wakuu wa mauaji ya Rais Jovenel Moïse." Mkuu wa polisi hakusema hao watu wengine wawili walikuwa akina nani.
Marekani yaingilia kutathmini hali ya usalama
Ujumbe wa maafisa wakuu wa usalama wa Marekani uliwasili Haiti jana Jumapili kutathmini hali ya usalama.
Timu hiyo pia itakutana na wanasiasa watatu wa Haiti. kila mmoja kati yao anadai kuwa kiongozi halali wa nchi.
Baada ya shambulio hilo, mamlaka ya Haiti iliziomba Marekani na UN kutuma vikosi nchini humo kulinda miundombinu muhimu.
Utawala wa Rais Joe Biden hapo awali ulikataa ombi hilo - lakini sasa umeamua kuangalia kwa karibu hali hiyo.
Bwana Moïse alikuwa rais wa Haiti, taifa maskini zaidi katika Amerika, tangu 2017. Wakati wake katika ofisi mgumu na alikabiliwa na tuhuma za ufisadi na kulikuwa na maandamano mengi katika mji mkuu na miji mingine mapema mwaka huu dhidi ya utawala wake.
Uchaguzi wa bunge ulipaswa kufanywa mnamo Oktoba 2019 lakini mizozo imechelewesha kura , ikimaanisha Bw Moïse alikuwa akitawala kwa amri. Alikuwa amepanga kufanya kura ya maoni juu ya mabadiliko ya katiba yaliyopendekezwa mnamo Septemba hii.
OPEN IN BROWSER
.jpg)
