Daktari asukumwa gerezani kwa kumdunga mkewe sindano ya sumu kumtoa 'majini'

Daktari mmoja nchini Uingereza, raia wa Misri amepatikana na hatia ya kumdunga mke wake sumu akiwa katika harakati za 'kumuondoa mapepo' yaliyokuwa yakimsumbua.

Daktari Kuozea Jela kwa Kumuua Mkewe Akitumia Sindano Akidai Kumtoa Mapepo

Hossam Metwally alihukumiwa kifungo cha miaka 14 gerezani kwa kumdunga mke wake sindano ya sumu.Picha:Grimsby live.

Hossam Metwally, mwenye umri wa miaka 34, alihukumiwa kifungo cha miaka 14 gerezani kwa kumdunga mke wake Wilson sindano ya sumu aina ya Nicortin kwa lazima akimtoa mashetani nyumbani kwao katika eneo la Grimsby .

Katika ushahidi uliotolewa katika Mahakama ya Sheffield, Metwally alidaiwa kumshutumu mke wake kuwa na 'majini ndani ya mwili wake, BBC imeripoti.

Apatikana na makosa 8

Daktari huyo alipatikana na makosa manane ikiwemo kujaribu kumuua mke wake, ulaghai na pia kutazama picha za utupu baada ya kunaswa na kamera za siri alizoziweka katika ndani ya kliniki yake ya kibinafsi.

 

Metwally alikamatwa baada ya Wilson kupatikana akiwa mahututi na kupoteza fahamu mnamo Julai 4, 2019 na kulazimka kulazwa.

Kufuatia uchunguzi uliofanywa na polisi, ilibainika kuwa kiwango kikubwa cha sumu za narcotics, zikiwemo zile za aina ya ketamine, propofol na fentanyl zilitumika.

Hata hivyo, jambo la kushangaza zaidi ni kwamba daktari huyo bingwa wa upasuaji, hakuonyesha kujutia kitendo hicho alipokuwa akijitetea kortini.

Daktari awaua wanawe kwa sindano

Katika kisa kingine kilichoshuhudiwa humu nchini, daktari mmoja kutoka Nakuru aliwaua wanawe wawili wenye umri wa miaka mitano na mitatu kwa sindano.

James Gakara alipatikana amelala kando ya wanawe akiwa amepoteza fahamu katika kisa ambacho anashukiwa kutekeleza mauaji na kujaribu kujiua.

Gakara ambaye alikuwa akipokea matibabu katika Hospitali ya Nakuru Level Five, aliaga dunia Jumatano, Septemba 22.

Kulingana na ripoti ya upasuaji wa maiti, Gakara alimeza kemikali isiyojulikana ambayo huenda ilisababisha kifo chake.

 

Mwanapatholojia Titus Ngulungu ambaye aliendesha zoezi hilo katika makafani ya hospitali ya Nakuru Level Five mnamo Ijumaa, Septemba 24 alishuku kuwa huenda marehemu alikunywa dawa.