Dereva aliyesababisha kifo cha Ngaiza asakwa na Polisi

 

​​​​​​​JESHI la Polisi mkoani Kagera linamsaka dereva wa lori lenye namba za usajili T505 CLB aina ya FAW TIPPER aliyefahamika kwa jina moja la Seleman, kwa kusababisha kifo cha mwandishi wa habari wa Azam Media, Nicolaus Ngaiza na kisha kutoroka.

Marehemu Nicolaus Ngaiza enzi za uhai wake.

Kamanda wa Polisi mkoani humo Revocatus Malimi, amesema kuwa uchunguzi wa kina kuhusiana na ajali hiyo iliyotokea jana (Septemba 05, 2021) katika eneo la Gwanseli wilayani Muleba mkoani humo unaendelea.

Malimi amesema kuwa chanzo cha ajali hiyo ni dereva wa lori hilo kutaka kulipita gari lililokuwa mbele yake bila kuchukua tahadhari na kusababisha kugongana uso kwa uso.

Amewataja waliojeruhiwa kuwa ni dereva wa gari dogo lenye namba za usajili T936 DAE aina ya Nissan Ex- Trail alikokuwa amepanda marehemu Nicolaus aitwaye Terezia Bujiku ambaye pia ni mwanasheria wa shirika la Mhola na mwandishi wa habari wa Clouds Media Group Benson Eustance ambao wanaendelea na matibabu na hali zao zinaendelea vizuri.

gari alilokuwa amepanda marehemu Nicolaus Ngaiza.

"Gari dogo lilikuwa likitoka Wilaya ya Biharamulo kuelekea Bukoba, lori lilikuwa likitoka Bukoba kwenda Kasindaga, yalipofika katika eneo hilo la Gwanseli, lori lilitaka kulipita gari lililokuwa mbele yake bila kujiridhisha kama kuko salama na ndipo magari hayo yakagongana" amesema RPC Malimi.

Nipashe imefika nyumbani kwa marehemu Nicolaus katika kijiji cha Bwara Bukoba Vijijini na kukuta maandalizi ya kuchimba kaburi  yakiendelea.

Marehemu Nicolaus Ngaiza ameacha mjane na watoto watatu. Bwana ametoa na Bwana ametwaa jina lake lihimidiwe, Amina.