Mamlaka ya Hali ya Hewa Tanzania (TMA) inatoa taarifa juu ya uwepo wa ongezeko la joto katika maeneo mengi nchini.
Taarifa iliyotolewa leo Jumatatu Novemba 8, 2021 na TMA imeeleza kuwa ongezeko hilo la joto linatokana na kusogea kwa jua la utosi sambamba na upungufu wa mvua katika maeneo mengi ya nchi kama ilivyotabiriwa awali.
“Hapa nchini, vipindi vya jua la utosi hufikia kilele mwishoni mwa Novemba wakati jua la utosi likiwa linaelekea Kusini (Tropiki ya Kaprikoni) na hali hiyo hujirudia tena Februari wakati jua la utosi likiwa linaelekea Kaskazini (Tropiki ya Kansa).
“Jua la utosi huambatana na hali ya Joto kali kwa sababu uso wa dunia katika eneo tajwa huwa karibu zaidi na jua kuliko maeneo mengine.
“Vilevile, hali ya joto kali hujitokeza zaidi kunapokuwa na upungufu wa mvua kama ilivyo katika kipindi hiki,” imefafanua taarifa hiyo.
Aidha taarifa hiyo imesema katika kipindi hicho viwango vya joto vilivyoripotiwa katika maeneo mbalimbali ni vikubwa ukiwenmo Mkoa wa Kilimanjaro ulioripotiwa kuwa kiwango cha juu cha joto kilichofikia nyuzi joto 36.4.
Joto hilo ni sawa na ongezeko la nyuzi joto 4.6 ukilinganisha na wastani wa muda mrefu kwamwezi Novemba.
Vilevile, kiwango cha juu cha joto katika Mkoa wa Dar es salaam kimefikia nyuzi joto 33.8 sawa na ongezeko la nyuzi joto 2.2 wakati katika mkoa wa Ruvuma kimefikia nyuzi joto 34.4 sawa na ongezeko la nyuzi joto 4.3.
Aidha imelezwa kuwa hali kama hii imejitokeza pia katika mikoa yote nchini ambapo kiwango cha joto kimekuwa kikubwa kuliko wastani wa muda mrefu.
“Vipindi vya joto kali vinatarajiwa kuendelea kujitokeza katika Novemba 2021 na kupungua kidogo ifikapo Disemba 2021, ambapo mtawanyiko wa mvua unatarajiwa kuongezeka sambamba na mionzi ya jua la utosi kuwa imeondoka katika maeneo ya nchi yetu.
TMA imewataka wananchi kufuatilia taarifa za mwenendo wa hali ya hewa wanazozitoa na kutumia ushauri wa wataalamu wa kisekta ili kujiepusha na madhara.
.webp)
