Simba kuvaa na Dar City leo
MABINGWA watetezi wa Kombe la Shirikisho la Azam (FA)Simba wanatarajiwa kushuka dimbani leo kuikaribisha timu ya First division Dar City katika mchezo utakaochezwa kwenye Uwanja wa Benjamin, Mkapa.
Mchezo huo wa hatua ya 32 bora ni muhimu kwa Simba kushinda ili kuvuka hatua inayofuata kama inataka kutetea taji hilo.
Wekundu hao wametoka kufanya vibaya katika mchezo wa Ligi Kuu dhidi ya Kagera Sugar waliofungwa bao 1-0 ugenini kwenye uwanja wa Kaitaba Jumatano.
Huenda wakarudi katika kasi kwa kuhakikisha wanashinda mchezo huo kurejesha imani kwa mashabiki wao.
Meneja Habari na Mawasiliano wa Simba Ahmed Ally alisema wanataka kuwafuta machozi mashabiki kwa kuwarejeshea furaha ya ushindi katika mchezo huo.
“Timu imejipanga imara na tunaamini wachezaji kwa maelekezo ya Kocha Pablo Franco watafanya vizuri ili kuwapa furaha mashabiki wetu, tuendelee kushikamana kwa kujitokeza kwa wingi kuinga mkono timu,”alisema.
Simba hawapaswi kuwabeza wapinzani wao kwa kuwa labda ni timu ndogo bali kuwaheshimu na kutafuta matokeo.
Mchezo mwingine utakaochezwa leo ni Mtibwa Sugar itakuwa ugenini mkoani Tanga dhidi ya timu ya Championship African Sports utakaochezwa kwenye uwanja wa Mkwakwani.
Ni mchezo mgumu ambao hauhitaji kuangalia timu ndogo au kubwa bali matokeo hivyo, kila mmoja anaweza kushinda kutegemea na alivyojiandaa dhidi ya mwenzake.
Pia, Kagera Sugar itakuwa ugenini dhidi ya timu ya Champioship African Lyon utakaochezwa kwenye uwanja wa Uhuru.
Huenda Kagera ikaendeleza ushindi baada ya kuonekana kurudi katika kiwango kizuri ikitoka kushinda bao 1-0 dhidi ya Simba kwenye mchezo uliopita wa Ligi Kuu.
Timu zitakazoshinda zitaungana na wengine waliotangulia hatua ya 16 bora kama Azam FC, Namungo, Pamba, Dodoma Jiji na Polisi Tanzania.
.jpg)
