Kumekucha...Ukraine Yadai Zimebaki Saa 48 Kabla Mtambo wa Nyuklia Kuanza Kuvuja Mionzi Hatari

Serikali ya Ukraine imesema zimebaki saa 48 kuanzia leo Jumatano, kabla ya mtambo mkubwa wa nyuklia wa Chernobyl haujaanza kuvuja mionzi hatari ya nyuklia ambayo italeta madhara makubwa kwa Ukraine nzima na nchi inazopakana nazo.

Kampuni ya Nguvu za Nyuklia ya Ukraine, Energoatom ambayo ndiyo iliyokuwa ikiufanyia marekebisho mtambo huo, imesema athari kubwa zinaweza kuanza kuonekana baada ya saa 48, kwani umeme kwenye eneo hilo ulikatwa na majeshi ya Urusi na majenereta ya dharura, yanayoendelea kutumika hadi sasa, yameishiwa nguvu.

Kampuni hiyo imeongeza kwamba kukosekana kwa umeme kwenye mtambo huo, kumefanya kazi ya kupoza mafuta yaliyotumika kuwa ngumu na kuonya kwamba endapo majeshi ya Urusi hayatawaruhusu wafanye matengenezo makubwa ya dharura, basi balaa kubwa lipo njiani kutokea.