"Ilikuwa Aibu kwa Kenya": Raila Odinga Akosoa Makamishna wa IEBC

Raila amekosoa tume ya uchaguzi nchini kutokana na mgawanyiko ulioshuhudiwa siku ya kutangaza matokeo ya urais

Amesema hilo lilileta aibu kubwa kwa Kenya katika macho ya nchi zingine ulimwenguni

Makamishna saba wa IEBC walitofautiana kuhusu matokeo ya uchaguzi wa urais na kufanya wanne kujitenga na alichotanagza Chebukati

Walisema Chebukati alikuwa ameendesha shughuli nzima ya hesabu ya kura hizo kwa siri kubwa

Kiongozi wa Azimio Raila Odinga amesema makamishna wa tume huru ya uchaguzi na mipaka nchini IEBC waliaibisha taifa baada ya tofauti zao.

Raosi

Raila Odinga na viongozi wa kanisa nyumbani kwake Karen. Picha: Raila

Akiongea na viongozi wa kanisa Jumamosi Agosti 20, Raila alisema kilichofanyika ni aibu kubwa kwa taifa.

Raila alisema picha ya Kenya kwenye macho ya kimtaifa iliharibika kuona kwamba watu ambao walikuwa wakifanya kazi muhimu ya uchaguzi walikosa kuelewana kuhusu mshindi wa uchaguzi wa urais.

"Iwapo wale ambao wamepewa kazi ya kutekeleza uchaguzi humu nchini wanaweza kufanya kazi ya aibu hivyo, basi ni wazi kuwa tuko nyuma kidemokrasia. Wakati kama huu hakuna watu ambao wangekuwa wanasherekea mshindi," alisema Raila.

Makamishna Juliana Cherera, Francis Wanderi, Justus Nyang'aya na Irene Masit walitofautiana na mwenyekiti wa IEBC Wafula Chebukati.

Walijitenga na matokeo aliyokuwa akitangaza na kusema ni yake binafasi na wala si ya tume nzima.

Chebukati alibaki na makamishna wawili ambao na upande wake ukasisitiza kwamba matokeo yaliyotolewa ndio ukweli wa mambo.

Baba Raila Amollo Odinga hata hivyo alisema ni ngumu kuamini hilo na Wakenya kwa sasa hawajui mshindi wa urais ni nani.

"Iwapo makamishna hao saba wa IEBC hawakupeana taarifa kama kitu kimoja, hiyo ilikuwa aibu kubwa katika macho ya nchi zingine," Raila alisema.

Kiongozi huyo alishauri wafuasi wake kusalia watulivu kipindi hiki akisema ana mpango wa kutafuta haki mahakamani.