Raila Afunguka Kuhusu Kupigiwa Simu na Ruto Kabla ya Tangazo la Chebukati

Punde baada ya kutangazwa Rais Mteule, William Ruto alidokeza kwamba alizungumza na mpinzani wake mkuu Raila kabla ya kuelekea katika ukumbi wa Bomas of Kenya

Raila alikiri kwamba Ruto alimpigia simu kumsalimu na walikubaliana kukutana baada ya matokeo ya urais kutangazwa

Hata hivyo, alibainisha kuwa hawajawahi kukutana wala kuzungumza tena tangu wakati huo kwa sababu anaamini kuwa Ruto hakushinda urais kihalali

Kinara wa Mrengo wa Azimio La Umoja One Kenya, Raila Odinga amefunguka kwa mara ya kwanza kuhusu mawasiliano yake kwenye simu na hasidi wake kisiasa William Ruto ambaye ni kiongozi waa Chama cha United Democratic Alliance (UDA) kabla ya matokeo ya urais kutangazwa.

Raila Odinga(kushoto) na William Ruto katika hafla ya awali. Picha: Raila Odinga.

Punde baada ya Mwenyekiti wa Tume Huru ya Uchaguzi na Mipaka (IEBC) Wafula Chebukati kumtangaza mshindi wa uchaguzi wa urais mnamo Agosti 15, Ruto alidokeza kwamba alizungumza na mpinzani wake mkuu Raila kabla ya kuelekea katika ukumbi wa Bomas of Kenya.

Magazetini Agosti 30: Kesi Nane Zimewasilishwa Kupinga Ushindi wa Ruto

Katika mahojiano na BBC Jumatatu, Agosti 29, Raila alikiri kwamba Ruto alimpigia simu kumsalimu na walikubaliana kukutana baada ya matokeo ya urais kutangazwa.

"Alinipigia simu kabla ya matokeo kutangazwa na akanisalimia tu na tulijisemea wakati huo, kwa sababu hatukujua nini kitatokea, kwamba tutakutana na kuzungumza," alisema Raila.

Kiongozi huyo wa ODM, hata hivyo, alibainisha kuwa hawajawahi kukutana wala kuzungumza tena tangu wakati huo kwa sababu anaamini kuwa Ruto hakushinda urais kihalali.

"Hatujakutana, wala hatujazungumza tangu wakati huo kwa sababu siamini kwamba yeye ndiye rais mteule. Nadhani ninafaa kuwa rais mteule. Na anajua, ndani ya moyo wake kwamba hakushinda chaguzi hizi, lakini mnufaika wa udanganyifu wa uchaguzi," alisema.

Waziri Mkuu huyo wa zamani pia alifunguka kuhusu uhusiano wake wa sasa na Rais Uhuru Kenyatta, ambaye alikuwa anampendelea kama mrithi wake.

Alibainisha kuwa hajazungumza na Kenyatta kuhusu hatua yake ya kupinga matokeo ya urais mahakamani.

Raila Asema Wafula Chebukati Anafaa Kufungwa Jela kwa Kuvurugha Uchaguzi

Kwa sasa macho yote yameelekezwa katika majaji saba wa Mahakama ya Juu wanatarajiwa leo Jumanne, Agosti 30, kuanza kusikiliza kesi ya kupinga matokeo ya uchaguzi wa urais wa Agosti 9.

Majaji hao wana kibarua kigumu ya kutibua mbivu na mbichi katika rundo la maelfu ya nakala za ushahidi uliowasilishwa na pande zote husika na kutoa uamuzi wao Jumatatu ijayo.

Wakenya sasa wana hamu ya kujua iwapo William Ruto alishinda kwa haki ama ushindi wake utafutiliwa mbali na uchaguzi mpya kuandaliwa.