LIGI ya soka Tanzania Bara inaendelea leo kwa michezo miwili kufanyika Dar es Salaam na Mbeya.
Vinara wa ligi hiyo Yanga itakuwa mwenyeji wa Polisi Tanzania kwenye uwanja wa Benjamin Mkapa, Dar es Salaam.
Akizungumza kuelekea mchezo huo Kocha Msaidizi wa Yanga Cedric Kaze amesema anaamini mchezo utakuwa na ushindani lakini pia timu imejiandaa vizuri kupata ushindi.
Yanga inaongoza ligi ikiwa na pointi 38 baada ya michezo 15 wakati Polisi Tanzania ipo nafasi ya 16 mwisho wa msimamo wa ligi ikiwa na pointi 9 baada ya michezo 15.
Katika mchezo mwingine leo Singida Big Stars ni wageni wa Tanzania Prisons kwenye uwanja wa Sokoine, Mbeya.
Singida BS ipo nafasi ya 4 ikiwa na pointi 27 baada ya michezo 15 wakati Tanzania Prisons ni ya 11 ikiwa na pointi 15 baada ya idadi kama hiyo ya mchezo.
Katika michezo mitatu ya ligi hiyo iliyofanyika Desemba 16 Mtibwa Sugar imeshindwa kuutumia uwanja wake wa nyumbani wa Manungu baada ya kulazimishwa sare ya bao 1-1 na Namungo.
Nazo Kagera Sugar na Azam zimegawana pointi baada ya kutoka sare ya mabao 2-2 kwenye uwanja wa Kaitaba mjini Bukoba, Kagera.
Ikicheza kwenye uwanja wake wa nyumbani wa Uhuru, Dar es Salaam Ruvu Shooting imekiona cha moto baada ya kuchapwa mabao 2-0 na Ihefu.
.jpg)
.jfif)