Mshindi wa Tuzo ya Oscar, Lupita Nyong’o, na mpenzi wake, Selema Masekela, wameachana baada ya takriban mwaka mmoja pamoja, tukio lililosababisha aandike maumivu aliyopitia, Oktoba 19.
Kupitia ukurasa wake wa Instagram bila kutaja jina la mpenzi wake wa zamani, alieleza kuwa alihitaji kufichua ukweli hadharani na kujitenga na mtu ambaye hawezi kumwamini tena.
Lupita alizungumzia machungu ya hivi karibuni ambayo amekuwa akipitia kutokana na mapenzi yaliyokatishwa ghafla na kwa udanganyifu. Alitambua kuwa maumivu haya yamemsababisha kuingia kwenye kipindi cha udhaifu na uchungu.
“Kuna mambo muhimu zaidi yanayoendelea ulimwenguni sasa hivi, na fikira zangu ziko pamoja na wale wanaoteseka sana. Wakati huu, ni muhimu kwangu kushiriki ukweli wa kibinafsi na kujitenga hadharani na mtu ambaye siwezi tena kumwamini,” aliandika.
Alijua kuwa kina cha maumivu yake kililingana na uwezo wake wa kupenda, na amechagua kukabiliana nacho kwa ujasiri na kwa matumaini kwamba kipindi hiki kigumu kitapita.
Mwigizaji huyo alieleza uamuzi wake wa kuweka hadharani maumivu yake, akieleza nia yake ya kusaidia wengine ambao wanaweza kuwa wanapambana na maumivu ya mapenzi.
Alisema anaaamini kwamba kwa kujadili maumivu yake mwenyewe, anaweza kutoa faraja, msaada, na hekima kwa wale ambao wanaweza pia kukabiliana na maumivu sawa.
“Najikuta katika kipindi cha maumivu ya moyo kutokana na mapenzi yaliyokatishwa ghafla na kwa udanganyifu. Ninajaribu kukimbilia kwenye vivuli na kujificha, na kurudi kwenye mwanga wakati nimejipatia nguvu za kusema, ‘maisha yangu ni bora kwa njia hii.’ Lakini ninakumbushwa kuwa kina cha maumivu ninayohisi ni sawa na kiasi cha uwezo wangu wa kupenda. Kwa hiyo, nimechagua kukabiliana na maumivu, kukuza ujasiri wa kukabiliana na maisha yangu kama yalivyo, na kuamini kwamba hata haya yatapita,” aliandika.
Lupita alitamka wazo kwamba moyo wa upole mwishowe unazaa ujasiri, akieleza matumaini yake kwamba imani hii ina ukweli.
“Ahadi ni kwamba moyo wa upole, wanasema, ndio unaosababisha ujasiri. Natumai hilo ni kweli… Natoa haya ili kuyahifadhi na natumaini kwamba maarifa ya uzoefu wangu yanaweza kuwa na manufaa kwa mtu mwingine anayekabiliana na kishiko cha maumivu ya moyo,” aliandika.
.jpg)
