AFISA Habari wa Simba SC Ahmed Ally amewatoa hofu wanachama na mashabiki kuwa watulivu na kuungana ili kutimiza malengo ya msimu ujao, baada ya Uongozi wa juu wa klabu ya Simba kutokuwa na maelewano na kuwa na makundi ndani ya timu.
Ahmed Ally kwenye ukurasa wake wa Instagram aliandika ujumbe kwenda kwa mashabiki na wapenzi wa timu hiyo.
“Nimemsikiliza kwa makini sana Mwenyekiti wetu Murtaza Mangungu kwenye mahojiano yake na Clouds Fm, itoshe kusema tu Mwana Simba mwenye mapenzi na klabu yake atakua amemuelewa vema Mwenyekiti.”
“Mwenyekiti ametolea ufafanuzi mambo mengi ya msingi lakini kubwa ni kwamba hakuna tofauti yeyote baina yake na Mwekezaji Mohammed Dewji na yeye anamuunga mkono Dewji na anamuheshimu na kumpongeza kwa kujitoa kwake katika klabu yetu na ataendelea kumpa ushirikiano kwa maslahi ya Simba Sports Club..
“Ameongeza kuwa kwa sasa kinachosubiriwa ni Mohammed Dewji kuteua Wajumbe wa Bodi kuziba nafasi ya wale waliojiuzulu kisha wakae kikao cha Bodi ya Wakurugenzi kujadili mustakabali wa timu yetu.
“Akihitimisha mahojiano yake kwa kuwataka Wana Simba kuwa watulivu huku akisema GIZA HALIONDOLEWI NA GIZA bali giza huondolewa na Mwangaza..
“Mtazamo wangu” Tumemsikia Mwenyekiti aliyejiuzulu Salim Abdallah, Tumemsikia Mwekezaji Mohammed Dewji na tumemsikia Mwenyekiti Murtaza Mangungu wote wamesisitiza Umoja na Utulivu
“Wana Simba tutulie na tuwape ushirikiano viongozi wetu wapate utulivu wa kuisuka Simba mpya tunayoitaka.
“Pia kumekua na Nukuu nyingi Fake za Mwenyekiti wetu Murtaza Mangungu zenye lengo la kumgombanisha na Mashabiki niwaombe Wana Simba tuachanae na taarifa hizo
“Simba mpya inakuja na Simba imara inarejea” Alisema Ahmed Ally.
.jpg)
