Wekundu wa Msimbazi, Simba SC, wameendelea kuthibitisha umahiri wao baada ya kupata ushindi wa mabao 2-0 dhidi ya Azam FC kwenye mechi ya Ligi Kuu Tanzania Bara iliyochezwa leo, Septemba 26, 2024, katika Uwanja wa New Aman Complex.
Huu ulikuwa ushindi muhimu kwa Simba ambao wanaendelea kuimarisha nafasi yao kwenye mbio za kutafuta ubingwa wa ligi msimu huu.
Simba SC ilianza kwa kasi kwenye dakika za mwanzo za mchezo huo, na juhudi zao zilianza kuzaa matunda mapema katika dakika ya 13 kupitia kwa mshambuliaji Leonel Ateba.
Goli hilo la kwanza lilikuwa pigo kwa Azam FC, ambao walijikuta wakipoteza udhibiti wa mchezo. Ateba alionyesha umahiri mkubwa alipokwepa mabeki wa Azam na kuachia shuti kali lililomzidi kipa wa Azam, na kuwapa Simba uongozi wa mapema.
Kipindi cha pili kilianza kwa Simba kuja na nguvu mpya, huku Fabrice Ngoma akiwa mchezaji wa kutegemewa kwa mara nyingine.
Katika dakika ya 47, Ngoma aliifungia Simba bao la pili kwa ustadi wa hali ya juu, baada ya kuunganisha pasi safi iliyomfikia ndani ya eneo la hatari. Azam walijaribu kurejea kwenye mchezo, lakini kila juhudi zao ziligonga mwamba kutokana na uimara wa safu ya ulinzi ya Simba.
Mchezo uliendelea kuwa mkali, lakini Simba walionekana kujiamini zaidi na kulinda ushindi wao mpaka kipenga cha mwisho kilipopulizwa. Ushindi huu unaiweka Simba SC katika nafasi nzuri zaidi kwenye msimamo wa ligi, huku Azam FC wakibaki na kazi kubwa ya kurekebisha makosa yao kabla ya mechi zijazo.
Mashabiki wa Simba waliondoka uwanjani wakiwa na furaha, huku wakiamini kwamba timu yao iko kwenye njia sahihi ya kuwania taji la Ligi Kuu msimu huu.
.jpg)
.jfif)