Msanii wa Kitanzania aishiye Marekani, @Wakazi, ameibua hoja kadhaa kuhusu Tuzo za Muziki za Tanzania (@tanzaniamusicaward) kuelekea kilele chake Jumamosi hii. Ameonyesha kutoridhishwa na baadhi ya vipengele na namna wasanii wa Diaspora wanavyokosa uwakilishi kwenye tuzo hizi, pamoja na mapungufu mengine yanayohitaji maboresho.
Wakazi anasema kuwa muziki wa Tanzania unakumbwa na changamoto ya kutafuta utambulisho, na moja ya maeneo yanayopuuzwa ni muziki wa asili na wasanii wa Tanzania wanaoishi nje ya nchi. Wasanii hawa wanachangia sana katika kuitangaza Tanzania kimataifa, lakini hawapewi nafasi stahiki kwenye tuzo.
Mfano, wasanii kama @gwaiithyword na @mrtzjumbe (wote kutoka Marekani) wametoa kazi nzuri mwaka jana lakini hawajatajwa kwenye tuzo. Wakazi pia anamtaja @Ericalulakwa, aliyepo kwenye kipengele cha "Wimbo wa Asili," huku akionyesha wasiwasi wake juu ya jinsi ambavyo wasanii wa Diaspora wanaweza kushindana kwa kura dhidi ya wasanii wenye mashabiki wengi kama Darassa, Young Lunya, au Joh Makini.
Wakazi anauliza kwa nini TMA inajumuisha vipengele vya "Nyimbo za Afrika" lakini hakuna kipengele kwa ajili ya wasanii wa Tanzania walioko nje ya nchi. Aidha, ameonyesha kutoridhishwa na kipengele cha #GlobalIcon, ambacho kimewapa nafasi wanamitindo na wanamichezo badala ya wasanii wa muziki. Kwa maoni yake, kipengele hiki hakina umuhimu katika tuzo za muziki.
Mapendekezo ya Wakazi:
1. Kuanzishwa kwa Kipengele cha Wasanii wa Diaspora - Wakazi anashauri kuwa TMA iweke kipengele maalum kwa wasanii wa Diaspora, ili kutoa nafasi kwa wasanii wanaoishi nje ya nchi na kuchangia katika kukuza muziki wa Tanzania kimataifa.
2. Uhakiki wa Kipengele cha Global Icon - Wakazi anaamini kama kipengele hiki kina umuhimu, basi tuwe makini katika kuchagua mshindi mmoja tu kwa mwaka, ambaye mchango wake katika muziki na jamii ni wa kweli na wa maana.
Wakazi anahitimisha kwa matumaini kwamba kamati ya TMA itaangalia kwa kina maoni haya ili kuboresha na kuongeza uwakilishi wa vipaji vya Watanzania kote duniani.
.jpg)
