Chama cha Demokrasia na Maendeleo (CHADEMA) kimesema kwamba Kamati Kuu ya chama kitakutana kesho Jumamosi, Desemba 14, 2024, ili kujadili masuala muhimu ya kisiasa na ya kiutawala.
Mkutano huo utakaofanyika chini ya uongozi wa Mwenyekiti wa Chama, Freeman Mbowe, utajadili ajenda kuu mbili.
Ajenda ya kwanza itakuwa ni usaili na uteuzi wa wagombea wa nafasi mbalimbali za uongozi katika Kanda za Kaskazini na Kati.
Huu ni mchakato muhimu ambao utahusisha uteuzi wa viongozi watakaoshiriki katika uchaguzi wa chama ngazi ya taifa.
Ajenda ya pili ni maandalizi ya Mkutano Mkuu wa Uchaguzi wa Chama ngazi ya Taifa.
Mkutano huu ni hatua muhimu katika kujiandaa kwa uchaguzi mkuu wa chama utakaofanyika hivi karibuni, ambapo wanachama watapiga kura kumchagua uongozi mpya wa chama.
Kwa mujibu wa taarifa iliyotolewa na Mkurugenzi wa Itifaki, Mawasiliano na Mambo ya Nje wa CHADEMA, Join Mrema, mkutano huu wa Kamati Kuu ni sehemu ya maandalizi ya chama kuelekea uchaguzi na kutekeleza ajenda yake ya kisiasa.
Mkutano huu unatarajiwa kuwa na athari kubwa katika kuimarisha demokrasia ndani ya chama na kutoa mwanga wa maendeleo katika siasa za upinzani nchini.
.webp)
.jpg)
.webp)
