Jeshi la Polisi Mkoa wa Mwanza limefanikiwa kuwakamata watuhumiwa 12 wanaodaiwa kujihusisha na vitendo vya uhalifu, baada ya kuwabaini wakiwa wamejificha katika mapango na maeneo ya milimani ndani ya jiji hilo. Hatua hiyo imekuja kupitia operesheni maalumu ya msako iliyofanyika kuanzia Novemba 29, 2025, katika maeneo mbalimbali ambayo yamekuwa yakitajwa kuwa maficho ya wahalifu.
Akizungumza wakati wa doria hiyo, Kamanda wa Polisi Mkoa wa Mwanza, DCP Wilbrod Mutafungwa, alisema operesheni ilihusisha maeneo ya Kata za Mkolani, Buhongwa, Samilo, Mhandu, Igoma Kati na Mahina katika Wilaya ya Nyamagana, pamoja na Kitangili, Bwiru Ziwani, Kawekamo na Ibungilo katika Wilaya ya Ilemela. Kwa mujibu wake, maeneo hayo ni miongoni mwa sehemu ambazo zimekuwa zikipokea malalamiko mengi kutoka kwa wananchi kuhusu uwepo wa makundi ya wahalifu wanaodaiwa kupanga matukio ya uporaji na uvunjaji nyumba.
Kamanda Mutafungwa alifafanua kuwa kabla ya operesheni hiyo, polisi walikuwa wakipokea taarifa za mara kwa mara kutoka kwa baadhi ya wakazi waliokuwa wakiona watu wasiofahamika wakijihifadhi katika mapango, milimani na maeneo yenye vichaka. Amesema taarifa hizo zilikuwa zikitaja kuwa kundi hilo mara kwa mara limekuwa likijihusisha na utengenezaji na usambazaji wa bangi, pamoja na kupanga mashambulizi ya uhalifu hasa nyakati za usiku.
“Wananchi wamekuwa wakitoa taarifa kuhusu watu wanaojificha katika maeneo ya mapango wakijiandaa kutekeleza matukio ya uhalifu, hasa kuelekea mwisho wa mwaka. Kutokana na ongezeko la malalamiko haya, tulilazimika kuchukua hatua za haraka ili kuzuia madhara yanayoweza kujitokeza,” alisema DCP Mutafungwa.
Katika operesheni hiyo ya kushtukiza, askari walifika katika maeneo yenye mapango yaliyokuwa yakihisiwa kuwa maficho ya wahalifu. Wakiwa na vifaa kamili vya doria, walipenya milimani na kufanikiwa kuwakamata watu 12 ambao walikutwa na vifurushi vinavyodaiwa kuwa bangi pamoja na vifaa vinavyotumika katika utengenezaji na utumiaji wa dawa hizo.
Kamanda Mutafungwa alibainisha kuwa hatua zaidi za uchunguzi zinaendelea ili kubaini mtandao mpana wa uhalifu unaoweza kuhusishwa na wahalifu hao, sambamba na kubaini kama kuna watu wengine waliokuwa wakiwasaidia na kuwapa hifadhi. Amesema watuhumiwa hao wanatarajiwa kufikishwa mahakamani baada ya taratibu za awali kukamilika.
Aidha, alitoa wito kwa wananchi wa Mwanza kuendelea kushirikiana na Jeshi la Polisi kwa kutoa taarifa mapema kuhusu viashiria vya uhalifu katika maeneo yao. Alisisitiza kuwa ushirikiano huo ndiyo njia pekee ya kuhakikisha mkoa unakuwa salama, hasa katika kipindi hiki cha mwisho wa mwaka ambacho mara nyingi huibuka wimbi la matukio ya kihalifu.
“Kwa pamoja tunaweza kuhakikisha Mwanza inabaki kuwa mahali salama. Wananchi wasisite kutoa taarifa pindi wanapohisi kuna mtu au kundi lisilofahamika katika maeneo yao,” aliongeza Kamanda Mutafungwa.
Jeshi la Polisi Mkoa wa Mwanza limeahidi kuendeleza doria na misako katika maeneo yenye historia ya uhalifu, ikiwa ni sehemu ya mkakati wa muda mrefu wa kupunguza matukio ya uhalifu na kuhakikisha usalama wa raia na mali zao unaimarika. Mfumo huu mpya wa kufuatilia na kukagua maeneo ya mapango umewatia matumaini wakazi wengi ambao kwa muda mrefu wamekuwa wakilalamikia uporaji, uvamizi na vitisho kutoka kwa makundi ya wahalifu wanaotumia maeneo hayo kama maficho.
Operesheni zaidi zinatarajiwa kuendelea katika siku zijazo, huku Jeshi la Polisi likisisitiza kuwa halitasita kuchukua hatua kali dhidi ya mtu yeyote anayehujumu amani ya Mkoa wa Mwanza.
