TIMU ya Taifa ya Tanzania ya vijana chini ya miaka 17, Serengeti Boys, itashuka dimbani leo Jumanne Juni 2, 2026 usiku kumenyana na Senegal katika fainali ya michuano ya TotalEnergies CAF U-17 AFCON Morocco 2026 itakayochezwa mjini Rabat, Morocco.
Mchezo huo wa fainali unatarajiwa kuchezwa katika Uwanja wa Moulay El Hassan kuanzia saa 4:00 usiku kwa saa za Morocco sawa na saa 10:00 jioni kwa saa za Tanzania.
Tanzania imeandika historia kwa kufika fainali hiyo kwa mara ya kwanza baada ya kuiondosha Misri kwa mikwaju ya penalti 4-3 kufuatia sare tasa ya dakika 90.
Mafanikio hayo yanaendelea kuonyesha ukuaji mkubwa wa soka la vijana nchini, hasa baada ya Tanzania kushinda mashindano ya CAF African Schools Football Championship kwa wavulana mwaka 2024 na 2025.
Kwa upande wa Senegal, walifika hatua hiyo baada ya ushindi mgumu dhidi ya wenyeji Morocco kwa penalti 7-6 kufuatia sare ya 1-1 katika mchezo wa nusu fainali uliochezwa mbele ya mashabiki wengi mjini Rabat.
Sasa Tanzania itakuwa ikisaka ubingwa wake wa kwanza wa AFCON U-17 huku Senegal wakitaka kuendelea kuthibitisha ubora wao katika kukuza vipaji vya soka barani Afrika.
Timu ya Taifa ya Misri kwa vijana wa umri chini ya miaka 17 imefanikiwa kutwaa medali ya shaba kwa kumaliza nafasi ya tatu kwenye michuano ya Kombe la Mataifa Afrika kwa vijana wa rika hilo (AFCON U-17) kufuatia ushindi wa 2-0 dhidi ya wenyeji Morocco.
Wenyeji, Morocco ambao ndio Mabingwa watetezi wamepoteza mchezo huo wa kutafuta mshindi wa tatu uliopigwa katika dimba la Mohammed VI Complex Nchini Morocco.
FT: Morocco 🇲🇦 0-2 🇪🇬 Egypt
⚽ 32’ Mohamed El Sayed
⚽ 90+12’ Ahmed Beshir
FAINALI AFCON U-17 LEO JUNI 2, 2026
22:00 Tanzania 🇹🇿 Vs 🇸🇳 Senegal
🏟️ Prince Moulay Hassan (Rabat)