Rais wa Jamhuri ya Muungano wa Tanzania, Mhe. Dkt. Samia Suluhu Hassan, leo Novemba 17, 2025 ametangaza Baraza jipya la Mawaziri, hatua ambayo imeleta mabadiliko makubwa katika sura ya uongozi wa Serikali. Katika mabadiliko hayo, baadhi ya mawaziri ambao walikuwa na ushawishi mkubwa katika Serikali ya awamu ya sita hawajatajwa tena kwenye nafasi zao, hatua inayoashiria mwelekeo mpya wa Rais katika kuimarisha utendaji, uwajibikaji na kasi ya utekelezaji wa miradi ya maendeleo.
Mawaziri saba ambao hawamo kwenye Baraza hilo jipya ni aliyekuwa Waziri wa Nishati na Naibu Waziri Mkuu, Dkt. Doto Biteko; Waziri wa Afya, Jenister Mhagama; na Waziri wa Kilimo, Hussein Bashe. Wengine ni aliyekuwa Waziri wa Viwanda na Biashara, Dkt. Seleiman Jafo; Waziri wa Mambo ya Ndani ya Nchi, Innocent Bashungwa; Waziri wa Maliasili na Utalii, Balozi Pindi Chana; pamoja na Waziri wa Katiba na Sheria, Dkt. Damas Ndumbaro.
Kutotajwa kwa viongozi hao kumekuwa gumzo kubwa katika duru za siasa, hasa ikizingatiwa nafasi muhimu walizokuwa wakishikilia katika kipindi cha nyuma. Dkt. Biteko, aliyewahi kuwa Naibu Waziri Mkuu na mmiliki wa mafanikio kadhaa katika sekta ya nishati, alikuwa mmoja wa viongozi waliotazamwa sana kutokana na usimamizi wa miradi mikubwa, ikiwemo ujenzi wa bomba la gesi, upanuzi wa uzalishaji wa umeme na mageuzi ya sekta ya madini. Kutokuwapo kwake katika Baraza jipya kumefungua mjadala mpana kuhusu mwelekeo mpya wa sekta hiyo.
Jenister Mhagama, ambaye alikuwa Waziri wa Afya, aliongoza wizara katika kipindi ambacho Tanzania ilikabiliana na mageuzi makubwa katika mifumo ya afya, ujenzi wa hospitali na maboresho ya upatikanaji wa dawa. Hata hivyo, Rais Samia ameamua kufanya mabadiliko katika wizara hiyo nyeti, hatua ambayo mara nyingi hutazamwa kama jitihada za kuongeza kasi ya maboresho ya huduma kwa wananchi.
Kwa upande wa kilimo, jina la Hussein Bashe kutokuwapo kwenye Baraza jipya nalo limeibua hisia mbalimbali, hasa kutokana na nafasi muhimu ya sekta ya kilimo katika uchumi wa taifa. Bashe alikuwa kinara wa kuhimiza maboresho ya kilimo cha kisasa, matumizi ya teknolojia na kuendeleza mazao ya kimkakati. Mabadiliko katika wizara hii yanaweza kuwa sehemu ya mkakati mpya wa Serikali kuimarisha uzalishaji, masoko na kuongeza thamani ya mazao.
Waziri wa zamani wa Viwanda na Biashara, Dkt. Seleiman Jafo, pamoja na Waziri wa Mambo ya Ndani, Innocent Bashungwa, pia hawakurejea. Jafo aliwahi kusimamia ajenda ya ujenzi wa uchumi wa viwanda, wakati Bashungwa alikuwa mstari wa mbele katika marekebisho ya Jeshi la Polisi na mifumo ya usalama. Hata hivyo, Rais Samia ameonyesha wazi kujenga timu mpya yenye nguvu zaidi na mtazamo mpya wa kimkakati.
Pia katika orodha ya waliokosekana ni Balozi Pindi Chana, aliyekuwa akiongoza Wizara ya Maliasili na Utalii, sekta muhimu kwa pato la taifa; na Dkt. Damas Ndumbaro, ambaye alikuwa akisimamia Wizara ya Katiba na Sheria. Kutokuwapo kwao kumetafsiriwa na wachambuzi kama sehemu ya mabadiliko ya kisheria, utawala bora na ulinzi wa rasilimali za taifa.
Kwa ujumla, mabadiliko haya ya Baraza la Mawaziri yanaakisi dhamira ya Rais Samia kuongeza ufanisi, kupandisha viwango vya uwajibikaji na kuharakisha utekelezaji wa miradi ya maendeleo. Ni hatua inayoashiria mwanzo wa sura mpya katika uongozi wa Serikali, huku Watanzania wakisubiri kuona sura mpya zitakazopewa dhamana na majukumu yaliyopo mbele yao.
MadundaTv
