Mganga Mkuu wa Mkoa wa Morogoro, Dk Best Magoma, amethibitisha kuwa miili 17 ya watu waliofariki dunia na kuteketea kwa moto katika ajali ya basi la Green Line na lori iliyotokea Oktoba 8, 2026, eneo la Mkambarani mkoani Morogoro, imetambuliwa kwa vipimo vya vinasaba (DNA). Kati ya miili hiyo iliyotambuliwa, miili 16 tayari imechukuliwa na ndugu zao kwa ajili ya taratibu za mazishi.
Ajali hiyo mbaya ilisababisha vifo vya watu 28, ambapo abiria 27 walikuwa kwenye basi hilo na mmoja alikuwa kwenye lori. Miili hiyo 17 iliyotambuliwa kisayansi ni sehemu ya vifo hivyo 28. Dk Magoma alieleza kuwa zoezi la utambuzi wa miili mingine iliyosalia linaendelea kufanywa na Ofisi ya Mkemia Mkuu wa Serikali kwa kushirikiana na mamlaka nyingine za usalama na afya. Kuhusu hali ya majeruhi, mganga mkuu huyo alisema wagonjwa wote wameruhusiwa kurejea nyumbani baada ya afya zao kuimarika, huku majeruhi wa mwisho akiruhusiwa asubuhi ya Oktoba 12, 2026.
Sintofahamu ya Majibu ya DNA na Changamoto za Usafiri
Licha ya hatua hiyo ya utambuzi, baadhi ya ndugu waliofika katika Hospitali ya Rufaa ya Mkoa wa Morogoro kutoa sampuli za vinasaba wameeleza kutoridhishwa kwao na kasi ya upatikanaji wa majibu, wakisema hali hiyo inawaweka kwenye wakati mgumu wa kisaikolojia. Raphael Mapambano, aliyetokea mkoani Mbeya kutafuta miili ya watoto wawili—binti yake Neema Raphael na mpwa wake Dola Moses ambao ni wanafunzi wa Chuo Kikuu cha Muungano (MuCO)—alisema amekuwa akilala hospitalini hapo tangu Jumamosi bila kupata majibu ya vipimo vyao. Watoto hao walikuwa wakisafiri kutoka Dar es Salaam kuelekea Mbeya baada ya kukamilisha mafunzo kwa vitendo.
Naye Joyce Mwaisangu, mkazi mwingine wa Mbeya aliyefika kutafuta mwili wa binti yake mfanyabiashara aliyekuwa amekaa kiti namba tano kwenye basi hilo, ameiomba Serikali kuingilia kati na kuwasaidia wafiwa kupata usafiri wa kusafirisha mabaki ya miili ya wapendwa wao. Mwaisangu alisisitiza kuwa gharama za kusafirisha miili kwenda mikoa ya mbali ni kubwa mno kwa familia nyingi zilizokumbwa na janga hilo.
Malalamiko Dhidi ya Mmiliki wa Basi
Wakati huohuo, familia ya aliyekuwa dereva wa basi la Green Line imeeleza kusikitishwa na kile walichokiita kutelekezwa na mmiliki wa basi hilo, Silaji Athuman. Athuman Ndosi, baba mzazi wa dereva huyo, alidai kuwa tangu walipowasili Morogoro hawajapata mawasiliano yoyote wala msaada wa mahitaji ya msingi kutoka kwa mwajiri huyo wa mwanawe.
Ndosi alieleza kuwa familia yake ililazimika kuzika mabaki ya mwili wa mwanawe katika makaburi ya Kola mkoani Morogoro, licha ya kwamba wao wanatokea mkoani Arusha, kutokana na ugumu wa mazingira waliyokumbana nayo. Aliongeza kuwa wamefanya mazishi hayo huku wakiwa na tahadhari kuwa huenda wakapewa vipande vingine vya mwili wa marehemu hapo baadaye baada ya vipimo vya DNA kukamilika, ambavyo wataenda kuvizika kwenye kaburi hilohilo.