Taarifa za kifo cha msanii maarufu wa ucheshi na ushereheshaji, MC Pilipili, zilizosambaa jana mitandaoni zimezua simanzi kubwa katika tasnia ya burudani na miongoni mwa mashabiki wake. Huku taifa likiendelea kuomboleza, mtangazaji na mwanaharakati wa mitandao ya kijamii, Mwijaku, ameibuka na kutoa ujumbe mzito kuhusu namna tunavyowathamini watu wakati wa uhai wao.
Kupitia hadithi yake ya Instagram, Mwijaku alizungumza kwa uchungu, akiwataka vijana kutafakari tabia iliyojengeka ya kusambaza picha nyingi za marehemu mitandaoni pindi wanapopoteza maisha, badala ya kuonyesha upendo, msaada na heshima wakati bado wako hai na wanaweza kunufaika na sapoti hiyo.
Mwijaku alisema kuwa kumwaga machozi na kupost picha nyingi za MC Pilipili hakutabadilisha ukweli kuwa mara nyingi jamii haimpi uzito mtu akiwa hai. Alisema watu wengi huwa wanakumbuka thamani ya wenzao pale tu wanapofariki, jambo ambalo linapaswa kubadilika kama jamii inataka kujenga msingi bora wa kuthaminiana.
Kama tuliona umuhimu wa kumpost Pilipili, tulipaswa kufanya hivyo akiwa anahitaji sapoti, si sasa tumempoteza,” aliandika.
Aliongeza kuwa msiba ni kipindi cha majonzi na kutafakari, hivyo badala ya kushindana kupakia picha na video za marehemu, jamii inapaswa kutumia muda huo kumuombea dua na kutafakari maisha, maadili na upendo wa kweli.
Katika ujumbe wake uliojaa unyenyekevu wa kidini, Mwijaku alisisitiza kuwa kilicho muhimu sasa ni kumuombea MC Pilipili apate mapokezi mema mbele ya Mola. Aliandika maneno ya faraja na maombi, akiwakumbusha vijana umuhimu wa kumrejesha marehemu kwa Mungu kwa dua, si kwa matendo yanayozidisha maumivu ya familia.
“Tumwombee dua Mungu aipokee roho yake na amuweke pahala pema peponi.
“Inna Lillahi Wa Inna Ilayhi Raji’un,” alimalizia.
Kauli hiyo imeungwa mkono na baadhi ya wadau wa tasnia ya burudani waliokuwa wakionyesha hisia zao mtandaoni, wakisema kwamba kweli jamii imekuwa ikichelewa kutambua mchango wa watu muhimu mpaka pale wanapopoteza maisha.
Kifo cha MC Pilipili kimeacha pengo kubwa katika uwanja wa burudani nchini. Alijipatia mashabiki wengi kupitia ucheshi wake, ubunifu na uwezo wa kuwasimamia sherehe kwa umahiri wa hali ya juu. Mara nyingi alisifika kwa ucheshi safi usio na ukakasi na kwa kuleta tabasamu kwenye nyuso za watu katika matukio mbalimbali.
Mashabiki na wasanii wenzake wamelipokea taarifa za kifo chake kwa majonzi makubwa, wakisema kwamba tasnia imepoteza mtu mwenye vipaji na moyo wa kujitoa.
Katika mtiririko wa salamu za rambirambi, wengi wamemkumbuka kama mtu aliyekuwa mnyenyekevu, mcheshi na mwenye heshima kwa kila mtu. Hakika, umauti wake umeacha pengo linaloogopwa kujazwa kwa urahisi.
