“Waacheni Watumie Pesa Zao!” – Musukuma Awatolea Uvivu Mwijaku na Dotto Magari Kuhusu Send-off ya Kifahari ya Geita
Mbunge wa Jimbo la Geita Vijijini, Joseph Musukuma, amejibu rasmi dhihaka na maoni yaliyotolewa na wanamitandao maarufu, Mwijaku na Dotto Magari, kuhusu maisha ya wakazi wa Kanda ya Ziwa pamoja na sherehe ya kifahari ya kuagwa (send-off) ya Monalisa Buyamba iliyofanyika Katoro, mkoani Geita.
Hafla hiyo iliyovutia maelfu ya watu na kuzua gumzo kubwa mitandaoni kutokana na zawadi za bei mbaya na fedha zilizomwagika, imeendelea kuigawa jamii katika mitazamo tofauti.
Kauli ya Musukuma: “Heshimuni Pesa za Watu”
Akizungumza kupitia video iliyosambazwa na Habari Digital, Musukuma amewataka watu kuheshimu jasho la wengine na jinsi wanavyoamua kutumia kipato chao kilichopatikana kwa njia halali.
“Si jambo sahihi kuwabeza au kuwakosoa wananchi wa Kanda ya Ziwa kwa kuandaa sherehe kubwa au kutumia fedha zao katika hafla za kifamilia. Kanda ya Ziwa ina watu wengi waliofanikiwa kiuchumi kupitia sekta halali kama madini, biashara na kilimo. Hivyo, si ajabu kuona wakifanya kufuru ya matumizi kwenye sherehe zao.” — Joseph Musukuma
Chanzo cha Mzozo: Send-off ya Monalisa Buyamba
Mjadala huu ulichochewa na kauli za Mwijaku na Dotto Magari walihoji matumizi makubwa ya fedha yaliyoshuhudiwa kwenye send-off hiyo. Wakati baadhi ya wanamitandao wakiponda sherehe hiyo kama ‘anasa na sifa zisizo na tija’, wengine waliitetea kama alama ya mafanikio na utajiri wa wakazi wa Katoro na Geita kwa ujumla.
Hoja Kuu za Mbunge Musukuma:
-
Heshima kwa Mafanikio: Jamii inapaswa kupongeza na kuheshimu mafanikio ya wengine badala ya kuonesha wivu au kuwakebehi, mradi tu fedha hizo zimepatikana kwa kufuata sheria.
-
Kupiga Vita Ukanda: Amewataka Watanzania kuepuka kutoa kauli zinazoweza kuleta mgawanyiko wa kikanda au kuwavunja moyo wapambanaji wanaofanya kazi kwa bidii.
-
Uhuru wa Kifedha: Kila mtu ana haki kamili ya kupangia matumizi fedha zake baada ya kulipa kodi na kupata faida halali.
Mitazamo ya Wadau Mitandaoni
Mjadala huo umeendelea kushika kasi huku ukigawanyika katika pande mbili kuu:
-
Upande wa Uhuru wa Matumizi: Unaounga mkono kuwa mtu ana haki ya kufanya lolote analotaka na fedha yake, na kwamba sherehe kubwa zinachochea mzunguko wa fedha kwa watoa huduma wa ndani (decorators, MCs, wapishi n.k).
-
Upande wa Maendeleo: Unaoshauri kuwa ni muhimu kuweka uwiano kati ya sherehe za anasa na uwekezaji katika shughuli za maendeleo ya muda mrefu.
Kauli hii ya Musukuma imekuja kama utetezi mzito kwa matajiri wa Kanda ya Ziwa, ikiongeza ladha mpya kwenye mjadala huo ambao bado unaendelea kutikisa kurasa mbalimbali za udaku na maisha ya kijamii nchini.