Bingwa wa zamani wa dunia mara mbili katika uzani wa juu, Anthony Joshua.
Bingwa wa zamani wa dunia mara mbili katika uzani wa juu, Anthony Joshua, alionyesha moyo wa kipekee baada ya kuinuka mara mbili kutoka chini na kumchapa kwa mtoano (TKO) mpinzani wake Kristian Prenga katika raundi ya pili ya pambano lisilo la ubingwa lililofanyika usiku wa kuamkia leo Jumapili Julai 26, 2026 mjini Jeddah.
Joshua, ambaye alikuwa akipigana kwa mara ya kwanza tangu ajali ya gari iliyotokea Nigeria mwezi Desemba iliyosababisha vifo vya marafiki zake wawili wa karibu huku naye akijeruhiwa, alianza pambano hilo vibaya baada ya kuangushwa na ngumi kali ya uppercut ndani ya sekunde 30 za kwanza.
Licha ya kuonekana kuyumba, Joshua aliinuka kabla ya hesabu kukamilika na kuendelea na pambano. Hata hivyo, Prenga alimwangusha tena kabla ya kengele ya kumaliza raundi ya kwanza, lakini Joshua aliweza kusimama kwa mara nyingine na kuendelea kupambana.
Katika raundi ya pili, Joshua alibadilisha kabisa mwenendo wa pambano hilo kwa kushambulia kwa mfululizo wa ngumi nzito kabla ya kumalizia kwa right hook iliyomrusha Prenga kupitia chini ya kamba za ulingo. Prenga alishindwa kuendelea na mwamuzi akasitisha pambano, na kumpa Joshua ushindi kwa mtoano wa kiufundi.
Akizungumza baada ya ushindi huo, Joshua alimpongeza mpinzani wake kwa kumpa ushindani mkali.
“Prenga ni mpiganaji mwenye nguvu na aliyenipa mtihani mzuri. Lakini hivyo ndivyo mabingwa wanavyofanya; tunaanguka, tunainuka na tunaendelea kupigana. Hivyo ndivyo maisha yalivyo,” alisema Joshua.
Ushindi huo umeendelea kufungua njia ya pambano kubwa linalosubiriwa kati ya Joshua na Tyson Fury, ambalo taarifa zinaeleza tayari limekubaliwa kufanyika baadaye mwaka huu, mradi wapiganaji wote wawili washinde mapambano yao ya maandalizi.
Tyson Fury naye alifanikiwa kushinda pambano lake dhidi ya Mariusz Wach nchini Thailand baada ya mpinzani wake kushindwa kuendelea kabla ya kuanza kwa raundi ya nane.
Promota wa Joshua, Eddie Hearn, alisema ushindi huo unaonyesha uthabiti mkubwa wa bondia huyo.
“Baada ya kuangushwa mara mbili katika raundi ya kwanza na wengi kuanza kuhofia kuhusu mustakabali wake, Joshua alionyesha moyo wa kipekee kwa kusimama tena na kupigania ushindi,” alisema Hearn.