Rais wa Shirikisho la Soka Duniani (FIFA), Gianni Infantino, amethibitisha rasmi kuwa timu ya taifa ya Iran itashiriki katika mashindano ya Kombe la Dunia 2026, licha ya mvutano wa kisiasa na kijiografia kati ya Iran, Marekani na Israel.
Akizungumza katika Mkutano wa 76 wa FIFA uliofanyika Vancouver Aprili 30, 2026, Infantino alisisitiza kuwa hakuna shaka yoyote kuhusu ushiriki wa Iran katika michuano hiyo mikubwa ya soka duniani. Aidha, alibainisha kuwa Iran itacheza kama ilivyopangwa, ikiwemo mechi zinazoweza kufanyika nchini Marekani, ambayo ni moja ya waandaaji wakuu wa mashindano hayo pamoja na Canada na Mexico.
Uamuzi huo unakuja wakati ambapo kulikuwa na wasiwasi mkubwa kutokana na hali ya kisiasa katika eneo la Mashariki ya Kati. Inadaiwa kuwa Iran iliwasilisha ombi la kutaka mechi zake zote zichezwe nchini Mexico badala ya Marekani, lakini FIFA imekataa pendekezo hilo, ikisisitiza kuwa Kombe la Dunia ni jukwaa la kuunganisha watu na mataifa mbalimbali duniani kupitia michezo.
Katika hatua nyingine, Rais wa Marekani, Donald Trump, ameunga mkono uamuzi huo kwa kusema hana pingamizi lolote kuhusu ushiriki wa Iran katika mashindano hayo. Kauli hiyo imekuja licha ya mapendekezo ya awali kutoka kwa mjumbe wake maalum, Paolo Zampolli, aliyewahi kupendekeza Italia ichukue nafasi ya Iran.
Kombe la Dunia 2026 linatarajiwa kuanza rasmi Juni 11 hadi Julai 19, 2026, likiwa ni la kwanza kufanyika katika nchi tatu kwa pamoja—Marekani, Canada na Mexico.