Jeshi la Iran limetangaza zawadi ya dola 30,000 kwa mtu atakayemuua au kumkamata mwanajeshi wa Marekani, huku wanawake wakiahidiwa mara mbili ya kiasi hicho.
Jeshi la Iran limetangaza kutoa zawadi yenye thamani ya dola 30,000 kwa mtu atakayemuua au kumkamata mwanajeshi wa Marekani, huku kiasi hicho kikiahidiwa kuongezwa mara mbili iwapo kitendo hicho kitafanywa na mwanamke.
Mkuu wa jeshi la Iran, Amir Hatami, amesema mpango huo uliandaliwa baada ya kupokea kile alichokitaja kuwa maombi mengi kutoka kwa watu waliotaka kushiriki.
Kwa mujibu wa shirika la habari la serikali IRNA, mtu atakayemuua au kumkamata na kumkabidhi mwanajeshi wa Marekani kwa mamlaka za Iran atalipwa toman bilioni tano, kiasi kinachokadiriwa kuwa sawa na dola 30,000.
Hatami hakueleza ni wapi au lini wanajeshi wa Marekani wanatarajiwa kuuawa au kukamatwa. Hadi sasa hakuna taarifa za kupelekwa kwa vikosi vya ardhini vya Marekani ndani ya Iran, isipokuwa wakati wa operesheni ya kumwokoa mwanajeshi wa Marekani mwezi Aprili.
Hatami pia amerudia wito wa Iran wa kuitaka Marekani iondoke Mashariki ya Kati. Amesema wanajeshi wa Marekani hawana tena ruhusa ya kuingia Ghuba ya Uajemi, Ghuba ya Oman au Mlango wa Hormuz.
Vita kati ya Tehran na Washington vilianza Februari 28, baada ya Marekani na Israel kuishambulia Iran. Zaidi ya mwezi mmoja baadaye, Marekani ilifanya operesheni kubwa ya kumwokoa afisa wa mfumo wa silaha wa ndege ya kivita aina ya F-15 iliyoangushwa.
Operesheni hiyo ilihusisha karibu wanajeshi 200 wa Marekani na zaidi ya ndege 170, waliokuwa wakiharakisha kumtafuta mwanajeshi huyo kabla hajakamatwa na vikosi vya Iran.
Katika operesheni hiyo, wanajeshi wa Iran waliharibu ndege ya mashambulizi ya ardhini aina ya A-10, ambayo baadaye ilitelekezwa katika eneo lililokuwa chini ya vikosi rafiki. Marekani pia inaripotiwa kuacha na kuharibu baadhi ya ndege zilizotumiwa katika operesheni hiyo, ikiwemo ndege ya usafirishaji ya C-130.
Siku chache kabla ya operesheni hiyo kubwa, rubani wa ndege hiyo ya F-15 alikuwa ameokolewa na kikosi cha helikopta katika operesheni nyingine ndogo.
Rais Donald Trump akitazama wakati kikosi cha Jeshi la Marekani kikibeba jeneza lenye mabaki ya Sajenti Angel Rampersad katika hafla ya heshima kwenye Kambi ya Jeshi la Anga ya Dover, Delaware, Jumatano, Julai 22, 2026.Picha: Bonnie Cash/UPI Photo/IMAGO
Mapigano yalisitishwa kwa muda kupitia makubaliano ya Aprili, baada ya karibu siku 40 za vita. Mfumo wa kuanzisha mazungumzo ya amani uliandaliwa mwezi Juni, lakini juhudi hizo zilivunjika baadaye.
Tangu wakati huo, Iran na Marekani zimeendelea kushambuliana kwa vipindi, huku mapigano yakijikita zaidi kusini mwa Iran na karibu na Mlango wa Hormuz. Mawasiliano yasiyo ya moja kwa moja kupitia wapatanishi yanaendelea, lakini hakuna dalili za mafanikio makubwa ya kidiplomasia.
Kwa mujibu wa taarifa zilizopo, wanajeshi 18 wa Marekani wameuawa tangu vita vilipoanza, wote nje ya Iran katika nchi zinazojumuisha Jordan na Iraq. Vifo vya karibuni zaidi viliripotiwa mwezi Julai.